Eslab qolish vasiyat qilingan: Toshkentda "Stalingrad kundaligi" front albomi ko‘rgazmasi ochiladi
Toshkent Fotosuratlar uyida 19-iyun kuni frontchi rassom Vladimir Mitrofanovich Petrovning (1920-1997) "Stalingrad kundaligi" ko‘rgazmasi ochiladi. Ko‘rgazma Rossiya Federatsiyasi elchixonasi tashabbusi bilan O‘zbekiston Badiiy akademiyasi tomonidan tashkil etilgan bo‘lib, Ulug‘ Vatan urushi boshlanganining yilligiga bag‘ishlangan.
Ko‘rgazmada namoyish etilayotgan asarlar "Eslab qolish vasiyat qilingan!" turkumiga kiradi. Bu loyiha O‘zbekistonda to‘rt yildan beri amalga oshirilib, oddiy askarlarning jasoratlari va xalqning bukilmas ruhini eslatib kelmoqda.
Petrovning front albomi urush yillarida – Stalingrad okoplarida, Kursk yoyi yo‘llarida, Belarus va Boltiqbo‘yining ozod etilgan shaharlarida yaratilgan. Uning qalam va akvarel chizgilari jang lahzalarini, safdoshlarining yuzlarini, shahar vayronalarini va frontdagi kundalik hayot manzaralarini aks ettiradi. Har bir tasvir shunchaki rasm emas, balki buyuk fojia va buyuk jasoratning muzlatib qo‘yilgan xotirasidir.
Rassom o‘z ko‘zi bilan ko‘rganlarini, boshidan kechirganlarini tasvirlagan. Uning front albomi u bilan birga Stalingraddan Kyonigsberggacha bo‘lgan yo‘lni bosib o‘tgan, unda urush nafasi va inson ruhining qudrati saqlanib qolgan.
Ko‘rgazmada Stalingrad uchun jang epizodlari, Belgorod va Kurskni ozod qilish, Rigaga hujum, hamda polkdoshlari – askarlar, qo‘mondonlar va hamshiralarning portretlarini ko‘rish mumkin bo‘ladi.
Ochilish marosimi 19-iyun kuni soat 17:00 da Toshkent Fotosuratlar uyida (Istiqbol ko‘chasi, 4-uy) bo‘lib o‘tadi. Kirish bepul.