Surxondaryoda ichki turizm yarmarkasi o‘tkazildi
Surxondaryo viloyatidagi “Boysun bahori” sayyohlik majmuasida “Ichki turizm yarmarkasi” bo‘lib o‘tdi. Tadbir mintaqadagi sayyohlik obyektlarini ommalashtirish, turizm sohasidagi tadbirkorlikni qo‘llab-quvvatlash hamda turoperatorlar va mijozlar o‘rtasidagi hamkorlikni mustahkamlashni maqsad qilgan.
Yarmarka doirasida mehmonlar viloyatning madaniy merosi, milliy markazlari, tabiiy diqqatga sazovor joylari va mahalliy hunarmandlarning buyumlari bilan tanishish imkoniyatiga ega bo‘ldilar. An’anaviy hunarmandchilik ko‘rgazmalari tashkil etildi, unda xalq ustalari o‘z asarlarini namoyish etdilar.
Ishbilarmonlik muzokaralariga alohida e’tibor qaratildi. “B2B” uchrashuvlari davomida turizm sohasi vakillari ichki turizmni rivojlantirish va sayyohlik yo‘nalishlarini kengaytirishga qaratilgan bir qator kelishuvlarni imzoladilar.