"Sayyohlar qayta kelishi uchun": Gayane Umerova mamlakatning yangi madaniy infratuzilmasi haqida
O‘zbekiston zamonaviy madaniy infratuzilma yaratish va yoshlarni jalb etishga e’tibor qaratgan holda kreativ iqtisodiyotni faol rivojlantirmoqchi. Toshkent xalqaro investitsiya forumi doirasida o‘tkazilgan "Kreativ iqtisodiyot: madaniy merosdan investitsion kelajakka" sessiyasida asosiy maqsad va loyihalar taqdim etildi.
Madaniyat va san’atni rivojlantirish jamg‘armasi raisi Gayane Umerova ta’kidlashicha, mamlakat boy tarixiy merosni saqlab qolgan holda, aholining qariyb 65 foizini tashkil etuvchi yosh avlodga e’tibor qaratib, kelajakka sarmoya kiritishi lozim.
"Biz ko‘p asrlar oldin Registon qurilganidek, mamlakatning yangi madaniy merosini yaratmoqchimiz," dedi Umerova yaponiyalik me’mor Tadao Ando loyihalagan yangi Davlat san’at muzeyi va Zamonaviy san’at markazi kabi yirik loyihalarni tilga olib. Uning so‘zlariga ko‘ra, bu tashabbuslar mamlakat rahbariyatining misli ko‘rilmagan qo‘llab-quvvatlashi tufayli amalga oshirilmoqda.
Jamg‘arma bir martalik tadbirlardan voz kechib, biennale va festivallar kabi doimiy faoliyat yurituvchi platformalar yaratishga intilmoqda. Bu madaniy turizmni bir martalik "rasmiyatchilik" tashrifidan muntazam tashrif buyurishga aylantiradi hamda xalqaro hamjamiyatning O‘zbekistonga bo‘lgan qiziqishini kuchaytiradi.
Bu g‘oyani CCA Tashkent badiiy direktori Sara Raza qo‘llab-quvvatlab, "tijorat madaniyat ortidan ergashadi," deb ta’kidladi. Misol sifatida u shaharni tubdan o‘zgartirib, sayyohlar oqimini jalb qilgan Bilbaodagi Guggenxaym muzeyini keltirdi.
"Toshkentdagi zamonaviy san’at markazi madaniy iqtisodiyotning shunday katalizatoriga aylanishi mumkin," deb hisoblaydi Raza. "Bu yangi ish o‘rinlari yaratilishiga, ustaxonalar, galereyalar, kafelar ochilishiga va hunarmandchilik rivojlanishiga olib keladi."
Yangi loyihalarda yoshlarni jalb etishga alohida e’tibor qaratilmoqda. Jumladan, CCA Tashkent’da 16 yoshdan 22 yoshgacha bo‘lgan yoshlarning o‘zlari boshqaradigan dastur ishga tushirilmoqda.
5-sentyabrdan 20-noyabrgacha bo‘lib o‘tadigan Buxoro biennalesi ana shunday yondashuvni aks ettiruvchi dastlabki yirik tadbirlardan biri bo‘ladi. Buxoroni nafaqat tarixiy, balki mintaqaning yangi madaniy markaziga aylantirish uchun qadimiy shaharga 70 dan ortiq jahonga mashhur rassomlar, me’morlar, musiqachilar va oshpazlar tashrif buyuradi.