Toshkentda O‘zbekiston va Xitoy rassomlarining qo‘shma ko‘rgazmasi ochildi
Ko‘rgazmada xitoy xattotligining turli uslublari, shuningdek, manzaralar, gullar va qushlar tasviri, an’anaviy xitoy texnikasidagi majoziy rangtasvir namoyish etilmoqda.
O‘zbekiston Badiiy akademiyasi galereyasi zalida Xitoy va O‘zbekiston rassomlarining qo‘shma ko‘rgazmasi ochilishi bo‘lib o‘tdi, bu poytaxt madaniy hayotida navbatdagi yorqin voqea bo‘ldi. Ko‘rgazma O‘zbekiston Badiiy akademiyasi tomonidan Xitoyning Chjetszyan provinsiyasi Xalqaro badiiy ayirboshlash uyushmasi bilan hamkorlikda tashkil etildi.
Bu asarlar o‘zbek ijodkorlari asarlari bilan yonma-yon bo‘lib, ikki mamlakat badiiy an’analarining boyligi va xilma-xilligini namoyon etadi.
Ochilish marosimida Xitoyning Chjetszyan provinsiyasi xalqaro badiiy almashinuv assotsiatsiyasi eksperti Yan Szyansin boshchiligidagi ijodiy delegatsiya ishtirok etdi.
Badiiy akademiya raisi, O‘zbekiston xalq rassomi Akmal Nuriddinov ochilish marosimida so‘zga chiqib, san’at chegara bilmasligini, bu O‘zbekiston va Xitoy o‘rtasida tasviriy san’at sohasida rivojlanib borayotgan munosabatlarda o‘z tasdig‘ini topayotganini ta’kidladi.
"O‘zbekiston va Xitoy Badiiy akademiyalari hamkorlikni yanada mustahkamlashga qaratilgan turli loyihalarni birgalikda amalga oshirmoqda. Bu xalqlarimizni bir-birining milliy san’ati va madaniyati bilan tanishtirishga katta hissa qo‘shadi," — dedi u.
Akmal Nuriddinov o‘tgan yili Pekinda bo‘lib o‘tgan O‘zbekiston san’ati ko‘rgazmasi va Xanchjoudagi "Bir buyuk mintaqa — bir farovon yo‘l" qo‘shma ko‘rgazmasi kabi muvaffaqiyatli loyihalarni yodga oldi. Shuningdek, joriy yilgi ko‘rgazmada Chjetszyan provinsiyasining taniqli ustalari bilan bir qatorda, Akademiya qoshidagi Rangtasvir ustaxonasida tahsil olayotgan iste’dodli o‘zbekistonlik yosh rassomlarning asarlari ham namoyish etilmoqda.
Xitoy delegatsiyasi rahbari Yan Szyansin o‘z nutqida tashkilotchilarga minnatdorlik bildirib, madaniy almashinuv muhimligini ta’kidladi.
"Xitoy va O‘zbekiston boy tarix va yorqin madaniyatga ega. Chjetszyan provinsiyasi savdo-iqtisodiy va madaniy hamkorlikni rivojlantirishga hissa qo‘shishga tayyor. Haqiqiy ko‘rgazma nafaqat Xitoy san’ati namoyishi, balki madaniy almashinuv ko‘prigi hamdir," — dedi u.
Yan Szyansin, shuningdek, ko‘rgazmada Chjetszyan provinsiyasidan bo‘lgan besh nafar rassomning yuqori mahorat va an’anaviy Xitoy san’atining chuqur ma’nosini aks ettiruvchi 25 ta asari namoyish etilganini ta’kidladi.
"San’at chegara bilmaydigan universal til. U makon va zamonni yengib o‘tadi, qalblarga ta’sir qiladi, his-tuyg‘ularni yetkazadi, o‘zaro tushunish va do‘stlikni mustahkamlashga hissa qo‘shadi, — dedi XXRdan kelgan mehmon. — Umid qilamizki, bunday almashinuvlar kelajakda ham davom etadi, madaniyatlarimiz o‘zaro o‘rganish va hamkorlikda rivojlanib, boyib boraveradi."
Ko‘rgazma bir necha kun davom etadi va shubhasiz, barcha san’at ixlosmandlari uchun muhim voqeaga aylanadi, ularga O‘zbekiston va Xitoyning zamonaviy rassomlari ijodi bilan tanishish uchun noyob imkoniyat yaratadi.