AQSH Samarqanddagi Sher-Dor madrasasini ta’mirlashni qo‘llab-quvvatlaydi
AQShning O‘zbekistondagi elchixonasi Samarqanddagi Sher-Dor madrasasini asrab qolishga qaratilgan yangi loyihani e’lon qildi. Loyiha O‘zbekiston Madaniy meros agentligi hamda Madaniyat va san’atni rivojlantirish jamg‘armasi bilan hamkorlikda amalga oshiriladi va shu kabi tashabbuslar orasida joriy yilda eng yirigi hisoblanadi.
O‘zbekiston taklifi xalqaro tanlov doirasida tanlab olindi va AQSH unga 500 ming dollar miqdorida grant ajratmoqda. Loyiha Markaziy Osiyo tadqiqotlari xalqaro instituti (IICAS) texnik ko‘magida bajariladi.
Loyihaning maqsadi — Sher-Dor madrasasi peshtoqini yuqori sifatli ishni ta’minlash uchun tajribali mahalliy ustalar va mutaxassislarni, shuningdek, xorijiy maslahatchilarni jalb etgan holda konservatsiyalash va ta’mirlashdan iborat. Amerika tomoni olimlar bilan aloqalarni yo‘lga qo‘yishda ko‘maklashadi va muhim hujjatlar hamda resurslarga kirishni ta’minlaydi. Ushbu loyiha 2001-yildan beri turli mamlakatlardagi madaniy yodgorliklarni saqlashga ko‘maklashib kelayotgan AQShning madaniy merosni saqlash bo‘yicha elchisi jamg‘armasi tomonidan qo‘llab-quvvatlanmoqda. Jamg‘arma tashkil etilganidan buyon O‘zbekistonda 14 ta loyihani moliyalashtirib, mamlakat madaniy merosini saqlash uchun 1,35 million dollarga yaqin mablag‘ ajratgan.
AQShning O‘zbekistondagi elchisi Jonatan Xenik ushbu hamkorlik tarixiy merosni asrab-avaylashga, mamlakatlar o‘rtasidagi aloqalarni mustahkamlashga va kelajak avlodlar uchun muhim madaniy obyektlarni saqlab qolishga xizmat qilishini ta’kidladi.