Toshkentda “GITIS: xorijdagi rus teatr maktabi” loyihasi boshlandi
Ushbu loyiha doirasida GITIS o‘qituvchilari O‘zbekiston davlat san’at va madaniyat instituti o‘qituvchilari, shuningdek, aktyorlar, teatr jamoalari rahbarlari va rejissyorlar uchun maktab va malaka oshirish kurslarini o‘tkazmoqda. Maktabda o‘qish 1-noyabrdan boshlanib, 12-noyabrda yakunlanadi.
Loyiha Prezident grantlari jamg‘armasi va A.M.Gorchakov nomidagi Ommaviy diplomatiyani qo‘llab-quvvatlash jamg‘armasi ko‘magida amalga oshirilmoqda.
O‘quv dasturi aktyorlik mahorati kafedrasi o‘qituvchilari Kseniya Kazakyevich va Mariya Orel tomonidan o‘tkaziladigan aktyorlik mahoratini o‘rgatishni o‘z ichiga oladi. Ishtirokchilar uchun drama rejissurasi kafedrasi katta o‘qituvchisi Tatyana Tarasova tomonidan teatr rejissurasi bo‘yicha mashg‘ulotlar ham ko‘zda tutilgan. Bundan tashqari, GITIS katta o‘qituvchisi va ustasi Yekaterina Granitova-Lavrovskaya tinglovchilarni teatr pedagogikasi nazariyasi va amaliyoti bilan tanishtiradi.
“GITIS: Xorijdagi rus teatr maktabi” loyihasi O‘zbekiston Madaniyat vazirligi tashabbusi bilan tashkil etilgan malaka oshirish dasturi doirasida amalga oshirilmoqda. Kurslar teatr mutaxassislarining kasbiy tayyorgarligini yaxshilashga qaratilgan bo‘lib, O‘zbekiston davlat san’at va madaniyat instituti va GITIS bilan hamkorlikda amalga oshiriladi. Umumiy dastur 30 noyabrga qadar davom etadi, kunduzgi va masofaviy mashg‘ulotlarni o‘z ichiga oladi. Dasturda oliy o‘quv yurtlarining 13 nafar o‘qituvchisi va Rossiya teatr san’atining ilg‘or uslublarini o‘zlashtiradigan davlat teatrlarining 18 nafar mutaxassisi ishtirok etmoqda.
Ta’lim yakunida barcha ishtirokchilar Rossiya teatr san’ati instituti tomonidan berilgan malaka oshirish sertifikatlariga ega bo‘ladilar.