Ekologiya vaziri YeIning O‘zbekistondagi yangi elchisi bilan uchrashdi
Ekologiya vaziri Aziz Abduhakimov Yevropa Ittifoqi delegatsiyasining O‘zbekistondagi yangi elchisi Toyvo Klaar bilan uchrashuv o‘tkazdi. Uchrashuvda tomonlar Ekologiya vazirligi va YeI o‘rtasidagi hamkorlik masalalarini muhokama qilishdi.
Asosiy e’tibor 2026-yil oxirigacha yakunlanishi rejalashtirilgan qo‘shma loyihalarni, shu jumladan kimyoviy konvensiyalar bilan bog‘liq loyihalarni amalga oshirishga qaratildi. Abduhakimov atrof-muhitni muhofaza qilish, xavfli kimyoviy va sanoat chiqindilari bilan ishlash bo‘yicha hamkorlikni kuchaytirish muhimligini ta’kidladi.
Vazir aytishicha, Yevropa Ittifoqi Stokgolm, Bazel va Rotterdam konvensiyalarini amalga oshirish uchun to‘rt million yevro miqdorida texnik yordam ko‘rsatgan, bu esa O‘zbekistonning institutsional salohiyatini oshirish va GSP+ talablariga muvofiq bo‘lishga yordam bermoqda. Uchrashuv davomida Chorkesar va Yangiobod hududlaridagi sobiq uran konlarini rekultivatsiya qilish ishlari muhokama qilindi. Bu maqsadda to‘qqiz million dollar miqdorida grant bitimi imzolangani qayd etildi.
Abduhakimov, shuningdek, mamlakatdagi keng ko‘lamli ekologik islohotlar, jumladan, O‘zbekiston Prezidenti huzurida Iqlim kengashining tashkil etilishi, “Yashil makon” loyihasi va Orol dengizida 2 million gektar maydonni o‘rmonzorlashtirish ishlari haqida ma’lumot berdi. Oliy ta’lim sohasidagi islohotlarga hissa qo‘shgan Erasmus+ singari Yevropa Ittifoqi bilan qo‘shma loyihalar ham ko‘rib chiqildi.
Uchrashuv yakunida tomonlar atrof-muhitni muhofaza qilish va iqlim o‘zgarishi sohasidagi hamkorlikni yanada mustahkamlash bo‘yicha kelishuvga erishdilar.