O‘zbekistonda "Xizmat ko‘rsatgan ekolog" unvoni joriy etiladi
Oliy Majlis Qonunchilik palatasining yig‘ilishida “O‘zbekiston Respublikasining xizmat ko‘rsatgan ekologi” faxriy unvonini ta’sis etish to‘g‘risida"gi qonun loyihasi qabul qilindi. Mazkur hujjat Prezidentning ekologik nazoratni kuchaytirish va atrof-muhitni muhofaza qilishga qaratilgan farmoni asosida ishlab chiqilgan.
Faxriy unvon ekologiya va tabiatni muhofaza qilish sohasida sezilarli yutuqlarga erishgan mutaxassislarni taqdirlash maqsadida ta’sis etilmoqda. U iqlim o‘zgarishi oqibatlarini yumshatish, tabiiy resurslardan oqilona foydalanish va ularni tiklash, hududlarni ko‘kalamzorlashtirish, aholining ekologik madaniyatini yuksaltirish hamda yoshlarni tabiatga hurmat ruhida tarbiyalash borasidagi yutuqlar uchun beriladi. Tashabbuskor kadrlar, ekofaollar va jamoatchilik nazoratchilarini qo‘llab-quvvatlashga alohida e’tibor qaratilgan.
Ushbu qonunning qabul qilinishi ekologik faoliyatni rag‘batlantirishning huquqiy asoslarini mustahkamlaydi va atrof-muhitni muhofaza qilish bilan bog‘liq kasblarning obro‘sini oshiradi.