O‘zbekiston va Misr ekologiya sohasida o‘zaro anglashuv memorandumini imzoladi
Ekologiya vaziri Aziz Abduhakimov Misrning rejalashtirish, iqtisodiy rivojlanish va xalqaro hamkorlik vaziri Raniya Al-Mashat bilan uchrashdi. Uchrashuv Toshkentda O‘zbekiston va Misr o‘rtasidagi savdo-iqtisodiy va ilmiy-texnikaviy hamkorlik bo‘yicha hukumatlararo komissiyaning 7-yig‘ilishi doirasida bo‘lib o‘tdi.
Abduhakimov O‘zbekistonda Prezident Shavkat Mirziyoyev tashabbusi bilan amalga oshirilayotgan yirik ekologik loyihalar haqida ma’lumot berdi. Bular orasida ko‘kalamzorlashtirish dasturlari, chang-qum bo‘ronlariga qarshi kurashish va Orolbo‘yi ekotizimini tiklash kabi loyihalar bor. Vazir Misrning Sinay sahrosi da 100 million daraxt ekish loyihasiga qiziqish bildirdi. Shuningdek, u 2025-yilning O‘zbekistonda Atrof-muhitni muhofaza qilish va “yashil” iqtisodiyot yili sifatida e’lon qilinganini ta’kidlab o‘tdi.
Tomonlar 2025-2027 yillarga mo‘ljallangan turizmni rivojlantirish bo‘yicha qo‘shma dastur yaratish masalalarini muhokama qildilar. Mamlakatlar o‘rtasidagi sayyohlik oqimini ko‘paytirish, ekoturizm va milliy merosni targ‘ib qilishga alohida e’tibor qaratildi.
Uchrashuv davomida ekologiya sohasida o‘zaro anglashuv memorandumi imzolandi. Muntazam maslahatlashuvlar o‘tkazish va qo‘shma tashabbuslarni amalga oshirish uchun ishchi guruh tuzish to‘g‘risida kelishuvga erishildi.
Misr delegatsiyasi, shuningdek, Ekologiya vazirligining vaziyatni kuzatish markaziga tashrif buyurib, atrof-muhit monitoringi tizimi va ekologik qonunbuzarliklarning oldini olish uchun mo‘ljallangan raqamli texnologiyalar bilan tanishdi.