Qashqadaryoda boloban noqonuniy saqlangani aniqlandi
Qashqadaryo viloyati Ekologiya boshqarmasi, prokuratura va IIB xodimlari tomonidan o‘tkazilgan reyd davomida Kasbi tumanida istiqomat qiluvchi fuqaroning ikkita bolobanni noqonuniy saqlash holati aniqlandi.
Boloban — O‘zbekiston Qizil kitobiga va yo‘qolib ketish xavfi ostidagi turlarning xalqaro ro‘yxatiga kiritilgan lochinlar oilasiga mansub yirtqich qush hisoblanadi. Ma’lumotlarga ko‘ra, bu qushlarning jahon populyatsiyasi 5,4 mingdan 15,4 ming juftgacha tashkil etadi.
Qoidabuzarga nisbatan ma’muriy bayonnoma tuzilib, qushlar reabilitatsiya qilish uchun Samarqand viloyatidagi Zarafshon milliy tabiat bog‘iga topshirildi. Tabiatga yetkazilgan zarar amaldagi me’yoriy hujjatlarga asosan 1 milliard 687 million 500 ming so‘mga baholandi.
To‘plangan materiallar keyingi tergov-surishtiruv ishlari va huquqiy baho berish uchun prokuraturaga yuborildi.