O‘zbekiston va BMTTD bioxilma-xillikni saqlash bo‘yicha bitim imzoladi
O‘zbekiston Ekologiya vazirligi va Birlashgan Millatlar Tashkilotining Taraqqiyot Dasturi (BMTTD) Bioxilma-xillikni saqlash bo‘yicha milliy strategiya va harakatlar rejalarini (NBSAP) yangilashni qo‘llab-quvvatlash hamda yettinchi milliy hisobotni tayyorlashga qaratilgan loyihani amalga oshirish to‘g‘risida kelishuvga erishdi.
Kelishuv Ekologiya vaziri Aziz Abduhakimov va BMTTD “Nature Hub” direktori Midori Pakston tomonidan Ar-Riyodda o‘tkazilgan BMTning Cho‘llanishga qarshi kurash bo‘yicha konvensiyasi (UNCCD) ishtirokchi davlatlari konferensiyasining 16-sessiyasi doirasida imzolandi.
Loyihaning maqsadi O‘zbekistonga global Kunmin-Monreal doiraviy dasturiga muvofiq biologik xilma-xillikni saqlash strategiyasini qayta ko‘rib chiqish va yangilashda ko‘maklashishdir. Shuningdek, loyiha mamlakatga tabiatni muhofaza qilish sohasidagi xalqaro majburiyatlarni bajarish bo‘yicha yettinchi Milliy hisobotni tayyorlash va taqdim etishda yordam beradi. Loyihani 2024-yil noyabrdan 2027-yil iyulgacha amalga oshirish rejalashtirilmoqda.
Ta’kidlash joizki, 2023-2024-yillarda BMTTD O‘zbekistonga biologik xilma-xillikni saqlash bo‘yicha yangi milliy maqsadlarni belgilashda ko‘maklashdi va respublika Markaziy Osiyoda BMTning Biologik xilma-xillik to‘g‘risidagi konvensiyasi doirasida ushbu maqsadlarni rasman e’lon qilgan birinchi davlat bo‘ldi.