Toshkentda attraksionlar va kafelarsiz noyob "yashil" bog‘ barpo etiladi
Joriy yil bahorda ochiladigan Toshkentning ilk jamoat bog‘i — Oxygen Parkda 300 tup daraxt o‘tqazildi. Yetti yildan ortiq vaqt mobaynida bu hudud qarovsiz qolgan edi. Bog‘ning asosiy xususiyati shundaki, u yerda attraksionlar va ovqatlanish shoxobchalari mutlaqo bo‘lmaydi. Oxygen Park shaharliklar tabiatdan bahramand bo‘la oladigan sokin yashil hordiq maskani bo‘ladi.
Ekologiya vaziri Aziz Abduhakimov ta’kidlaganidek, bog‘ Yevropa va Yaponiya andozalari asosida, mahalliy iqlimga moslashgan o‘simliklardan foydalangan holda bunyod etilmoqda.
Bu yerda noyob atirgulzor (100 turdan iborat), tabiiy ko‘l, qushlar uchun inlar barpo etiladi. So‘qmoqlar tosh bilan qoplanadi, o‘rindiqlar esa quruq yog‘ochdan yasaladi. Bog‘ga kirish bepul bo‘ladi, hudud tozaligini saqlash maqsadida axlat qutilari faqat kiraverishga o‘rnatiladi.
Oxygen parkda jami 1200 dan ziyod daraxt (jumladan, shumtol, zarang, eman, jo‘ka, qarag‘ay, sarv, tol, magnoliya va boshqalar) hamda 23 ming tup buta ekish ko‘zda tutilgan. O‘simliklarni sug‘orish uchun sun’iy hovuz va quyosh energiyasida ishlaydigan yer osti qudug‘i barpo etiladi.
Ilgari bu hududda astronomiya bog‘i, gulzor va hatto turar-joy binolari qurish rejalashtirilgan edi. Biroq Ekologiya vazirligining sa’y-harakatlari tufayli yashil hududni saqlab qolishga va Toshkent uchun noyob jamoat bog‘i loyihasini yaratishga erishildi.
Eslatib o‘tamiz, yaqinda shahardagi uchta Yangiyo‘l maktabida o‘quvchilar, o‘qituvchilar, G‘alaba ko‘ngillilari va Rus uyi xodimlari Ulug‘ Vatan urushi tugaganidan buyon o‘tgan har bir yil uchun bittadan — jami 80 ta mevali daraxt ekishdi. Aprel oyida davom etadigan “G‘alaba bog‘i” aksiyasi Rossotrudnichestvoning O‘zbekistondagi vakolatxonasi tomonidan uyushtirildi.