O‘zbekistonning yirik shaharlarida zararli ishlab chiqarishlar 1-maydan to‘xtatiladi
O‘zbekistonda 1-maydan boshlab yangi ekologik xavfli korxonalarni ishga tushirish taqiqlanadi. Ushbu qaror 2025-yilga mo‘ljallangan Davlat dasturi doirasidagi prezident farmonida o‘z aksini topgan. Cheklovlar Toshkent, Nukus va viloyat markazlariga tegishli bo‘ladi.
Zamonaviy tozalash tizimlari bo‘lmagan asbest, sement, shlam, shlak ishlab chiqarish, ko‘n-teri zavodlari, parrandachilik fabrikalari va metallurgiya korxonalari taqiqlanadi. Shuningdek, I va II xavflilik darajasidagi chiqindilarni qayta ishlash va yoqish uchun yangi obyektlar qurish ham man etiladi.
Vazirlar Mahkamasiga 1-oktyabrgacha cheklovlarga tushgan mavjud korxonalarni yirik shaharlardan bosqichma-bosqich olib chiqish bo‘yicha takliflar ishlab chiqish topshirildi. Jami 168 ta ishlab chiqarishni ko‘chirish rejalashtirilmoqda, bu esa havo ifloslanishi darajasini sezilarli darajada pasaytiradi.
Shu bilan birga, sanoat hududlarida yangi ish o‘rinlari yaratiladi va infratuzilma — transport magistrallari, elektr ta’minoti, gaz va suv ta’minoti tizimlari rivojlantiriladi. Ko‘mirdan foydalanuvchi korxonalar zamonaviy chang-gaz tozalash tizimlarini o‘rnatishlari shart bo‘ladi.
Bundan tashqari, sanoat chiqindilarini qayta ishlab qurilish materiallari ishlab chiqarish, parrandachilik fabrikalarida bioenergetika texnologiyalarini rivojlantirish, ko‘n-teri zavodlari uchun tozalash inshootlari barpo etish dasturlari joriy etiladi. Ushbu chora-tadbirlar zararli chiqindilarni kamaytirish va hududlarning ekologik barqarorligini oshirishga qaratilgan.