Hayvonot va o‘simlik dunyosini muhofaza qilish to‘g‘risida qonun qabul qilindi
O‘zbekistonda hayvonot va o‘simlik dunyosini muhofaza qilishni kuchaytirish maqsadida yangi qonun qabul qilindi. Hujjat Jinoyat kodeksi, Ma’muriy javobgarlik to‘g‘risidagi kodeks, shuningdek, ‘Hayvonot dunyosini muhofaza qilish va undan foydalanish to‘g‘risida"gi hamda ‘Ov qilish va ovchilik xo‘jaligi to‘g‘risida‘gi qonunlarga o‘zgartishlar kiritishni nazarda tutadi.
Yangi qoidalarga ko‘ra, hayvonot yoki o‘simlik dunyosiga, ayniqsa, oldindan til biriktirib katta miqdorda zarar yetkazganlik uchun javobgarlik kuchaytirildi. Jarimalar bazaviy hisoblash miqdorining 400 baravarigacha yetkazildi, jazo esa axloq tuzatish ishlari, uch yilgacha ozodlikni cheklash yoki ozodlikdan mahrum qilishni o‘z ichiga olishi mumkin.
Bundan tashqari, ovchilik va baliqchilikning taqiqlangan usullari, jumladan, elektr toki, portlovchi moddalar va kimyoviy moddalardan foydalanishga qarshi choralar joriy etildi. Bunday harakatlar uchun yetti yilgacha ozodlikdan mahrum qilish jazosi belgilandi.
Ma’muriy javobgarlik to‘g‘risidagi kodeksda daraxt va butalarga, ayniqsa kimyoviy moddalarni qo‘llagan holda qasddan zarar yetkazganlik uchun jarimalar oshirildi. Shuningdek, noqonuniy ov qilish, baliq ovlash va ekologik nazorat inspektorlari faoliyatiga to‘sqinlik qilganlik uchun javobgarlik ham kuchaytirildi.
Qonun bilan noqonuniy yo‘l bilan qo‘lga kiritilgan hayvonlar, ov quroli va qoidabuzarliklarda foydalanilgan boshqa vositalarni olib qo‘yish tartibi aniqlashtirilib, baliq ovlashning ruxsat etilgan qurollariga aniqlik kiritildi. Shuningdek, daraxtlar va butalarni noqonuniy kesishning oldini olish choralari belgilandi.
Ushbu qonunning asosiy maqsadi biologik resurslarni muhofaza qilish darajasini oshirish, noqonuniy ov qilish va o‘simliklarni yo‘q qilish holatlarini kamaytirish, hamda davlat ekologik nazoratining rolini kuchaytirish hisoblanadi.