O‘zbekiston Orxus konvensiyasiga qo‘shildi
O‘zbekiston Prezidenti 2025-yil 11-martda ekologik shaffoflikni ta’minlash va atrof-muhitni muhofaza qilish masalalarini hal etishda fuqarolarning faol ishtirokini rag‘batlantirishga qaratilgan Orxus konvensiyasiga qo‘shilish to‘g‘risidagi qonunni imzoladi. Mazkur hujjat O‘zbekiston Respublikasi Konstitutsiyasining 49-moddasiga muvofiq qabul qilingan bo‘lib, unda har bir fuqaroning qulay atrof-muhitga ega bo‘lish va uning holati haqida ishonchli ma’lumot olish huquqi kafolatlangan.
1998-yil 25-iyunda Orxus shahrida imzolangan ushbu Konvensiya ekologiya masalalarida davlat va jamiyat o‘rtasidagi o‘zaro hamkorlik mexanizmlarini tartibga soladi. U davlat muassasalariga fuqarolarga havo, suv va tuproq sifati to‘g‘risida ma’lumot berish, shuningdek, ekologik dasturlar va loyihalarni ishlab chiqishda jamoatchilik fikrini inobatga olish majburiyatini yuklaydi. Bundan tashqari, konvensiya fuqarolarning ekologik huquqlarini sud orqali himoya qilish imkoniyatini ham nazarda tutadi.
Mazkur xalqaro bitimga qo‘shilish O‘zbekistonning global ekologik kun tartibidagi mavqeini mustahkamlashga, xorijiy hamkorlar bilan aloqalarni rivojlantirishga va mamlakatning xalqaro nufuzini oshirishga xizmat qiladi. Qonun Qonunchilik palatasi tomonidan 2024-yil 11-dekabrda ma’qullangan va Senat tomonidan 2025-yil 22-fevralda tasdiqlangan.