O‘zbekistonda havo ifloslanishini monitoring qilish uchun avtomatlashtirilgan stansiyalar o‘rnatiladi
O‘zbekiston Respublikasi Vazirlar Mahkamasining "Sanoat korxonalarining atrof-muhitga salbiy ta’sirini kamaytirishni ta’minlash chora-tadbirlari to‘g‘risida‘gi qarori qabul qilindi. Ushbu hujjat doirasida respublika bo‘ylab atmosferadagi havo ifloslanishini monitoring qilish uchun 347 ta kichik avtomatlashtirilgan stansiya o‘rnatilishi rejalashtirilgan. Mazkur stansiyalar joylashtiriladigan hududlarning manzilli ro‘yxati qaror bilan tasdiqlangan.
Monitoring stansiyalari ekologiyaga I va II darajadagi ta’sir ko‘rsatadigan korxonalarda o‘rnatiladi. Shuningdek, ushbu obyektlarda yuqori samaradorlikka ega chang-gaz tozalash uskunalari va mahalliy suvni tozalash inshootlari o‘rnatilib, ekotizimga salbiy ta’sirni kamaytirish rejalashtirilgan. Sanitar-himoya zonalari tashkil etilgan hududlarda esa atrof-muhit holatini doimiy kuzatish uchun avtomatlashtirilgan postlar joylashtiriladi.
Monitoring stansiyalari, chang-gaz tozalash uskunalari va suvni tozalash inshootlarining mavjudligini tekshirish ishlari Ekologiya vazirligi tomonidan nazorat qiluvchi organlar bilan oldindan kelishmasdan amalga oshiriladi. Ammo tekshiruv boshlangandan 24 soat ichida vakolatli organlarga bu haqda xabar berish talab etiladi.
2025-yilning 1-martigacha barcha zarur stansiyalar sotib olinib, o‘rnatilishi rejalashtirilgan. Shundan so‘ng, ushbu stansiyalardan olinadigan ma’lumotlar davlat ekologik monitoring tizimining yagona geoinformatsion bazasiga integratsiya qilinadi.