IHT mamlakatlari ekologik hamkorlikni mustahkamlash masalalarini muhokama qildi
Bokudagi O‘zbekiston Milliy pavilyonida Iqtisodiy hamkorlik tashkiloti (IHT) ishchi guruhining atrof-muhitni muhofaza qilish bo‘yicha yig‘ilishi bo‘lib o‘tdi. Unda IHT bosh kotibi Asad Majid Xon, O‘zbekiston ekologiya vaziri o‘rinbosari Obidjon Qudratov va tashkilotga a’zo davlatlar vakillari ishtirok etdi.
Yig‘ilishda mintaqadagi atrof-muhitning hozirgi holati va ekologik muammolarni hal etishda hamkorlikdagi sa’y-harakatlarni kuchaytirish bo‘yicha qadamlar muhokama qilindi. Ishtirokchilar mintaqaning iqlim o‘zgarishi oldidagi zaifligi hamda uning noyob ekotizimlar, suv zaxiralari va biologik xilma-xillikni o‘z ichiga olgan tabiiy boyliklarini ta’kidladilar.
Qudratov tabiatni asrash va barqaror rivojlanish uchun birgalikdagi harakatlar muhimligini ta’kidlab, O‘zbekiston IHT doirasidagi ekologik hamkorlikni doimo qo‘llab-quvvatlab kelganini aytdi. Shuningdek, u tashkilotni yangi xavf-xatarlarga moslashtirishning zarurligi haqida fikr bildirdi.
Muhokamalar davomida qo‘shma ekologik loyihalarni amalga oshirish bo‘yicha tashabbuslar ilgari surildi. Ular orasida qayta tiklanadigan energetikani rivojlantirish, cho‘llanishga qarshi kurashish, suv resurslaridan samarali foydalanish va biologik xilma-xillikni saqlash kabi g‘oyalar bor.