COP29da BMT Bosh kotibi o‘rinbosari O‘zbekistonning Milliy pavilyonini ziyorat qildi
BMT Bosh kotibi o‘rinbosari va BMT Atrof-muhit dasturi (YUNEP) ijrochi direktori Inger Andersen Bokudagi COP29 anjumanida O‘zbekiston Milliy pavilyonini ziyorat qildi.
Uchrashuv davomida Andersen O‘zbekistonning YUNEP bilan faol hamkorligi va mamlakatning tabiatni muhofaza qilish tashabbuslarini amalga oshirishdagi ishtiroki uchun minnatdorchilik bildirdi. U O‘zbekistonda o‘tkazilgan yuqori darajadagi tadbirlar, xususan, BMTning atrof-muhitni muhofaza qilish konvensiyalari sessiyalari va anjumanlarining ahamiyatini alohida ta’kidladi.
O‘zbekiston pavilyoni barqaror rivojlanish masalalariga mazmunli yondashuvi bilan unga katta taassurot qoldirdi. Andersen ekspozitsiyaning respublika tabiiy va madaniy merosini o‘ziga xos tarzda namoyish etishi bilan ajralib turishini, boshqa mamlakatlar uchun namuna bo‘lganini qayd etdi.
Inger Andersen, shuningdek, 2025-yil 24-noyabrdan 5-dekabrgacha Samarqandda bo‘lib o‘tadigan Yovvoyi fauna va flora turlarining xalqaro savdosi to‘g‘risidagi Konvensiya (CITES COP20) ishtirokchilarining 20-anjumaniga taklif etildi.