O‘zbekistonda yashirin iqtisodiyotga qarshi kurash kuchaytiriladi
Oliy Majlis Qonunchilik palatasining yig‘ilishida yashirin iqtisodiyotga qarshi kurashni takomillashtirish maqsadida yangi qonun loyihasi ko‘rib chiqildi. Islohotlarning muhim qismi respublika moliya tizimining barqarorligini ta’minlashga qaratilgan.
So‘nggi yillarda O‘zbekistonda fuqarolar va davlat manfaatlarini jinoiy xatti-harakatlardan himoya qilish, shuningdek tergov organlari faoliyati samaradorligini oshirishga qaratilgan keng ko‘lamli islohotlar amalga oshirilmoqda.
Qonunchilikni yanada takomillashtirish doirasida bir qator muhim hujjatlarga, xususan, Jinoyat-protsessual kodeksi, Ma’muriy javobgarlik to‘g‘risidagi kodeks va Byudjet kodeksiga o‘zgartishlar kiritish taklif etildi. O‘zgartirishlar Bosh prokuratura huzuridagi Iqtisodiy jinoyatlarga qarshi kurashish departamentining vakolatlariga taalluqli bo‘lib, unga byudjet qonunchiligi buzilishlarini tekshirish hamda moliyaviy oqimlar ustidan nazoratni kuchaytirish bo‘yicha qo‘shimcha vazifalar yuklatiladi.
Bundan tashqari, qonun loyihasida jinoyat ishlari bo‘yicha qo‘shimcha tekshiruv o‘tkazish tartibini takomillashtirish va dastlabki tergov organlari faoliyatini yaxshilashga qaratilgan o‘zgartishlar ham o‘z aksini topgan.