Investitsiyalar vaziri metallurgiya sohasi vakillari bilan uchrashdi
Investitsiyalar, sanoat va savdo vaziri Laziz Qudratov metallurgiya mahsulotlarini ishlab chiqarish va import qilish bilan shug‘ullanuvchi 20 dan ortiq korxona rahbarlari ishtirokidagi davra suhbatida qatnashdi.
Uchrashuvda import qilinayotgan metall narxlarini tartibga solish, sifatsiz mahsulotlarning kirib kelishini oldini olish va metall buyumlarni markirovka qilish masalalari muhokama etildi. Mahalliy ishlab chiqaruvchilarni qo‘llab-quvvatlash choralariga alohida e’tibor qaratildi. Tadbirkorlar o‘z taklif va muammolarini bildirdilar. Bu masalalar batafsil o‘rganildi va ularni hal etish uchun aniq muddatlar va mas’ul ijrochilar belgilangan ‘Yo‘l xaritasi‘ni ishlab chiqish taklif etildi.
Bundan tashqari, korxonalar va vazirlik o‘rtasida tezkor hamkorlik mexanizmi kelishib olindi. Bu bozor holati haqidagi ma’lumotlarni kundalik almashish, ishlarni samarali rejalashtirish va talab yuqori bo‘lgan mahsulotlar ishlab chiqarishni kengaytirish imkonini beradi.