Markaziy bankda UnionPay bilan hamkorlik istiqbollari muhokama qilindi
O‘zbekiston Markaziy bankida UnionPay xalqaro to‘lov tizimi vitse-prezidenti Liu Xeng boshchiligidagi delegatsiya bilan uchrashuv o‘tkazildi. Uchrashuvda kompaniyaning O‘zbekistondagi joriy faoliyati, erishilgan natijalar va kelajak rejalari muhokama etildi.
UnionPay vakillari mamlakatdagi faoliyatini kengaytirish va yangi innovatsion xizmatlarni joriy etish niyatida ekanliklarini bildirdilar. Rejalar qatorida onlayn to‘lov tizimlarini rivojlantirish, QR-kodlar orqali to‘lov imkoniyatlarini kengaytirish va mahalliy banklar bilan integratsiyani yanada chuqurlashtirish ko‘zda tutilgan.
Shuningdek, Xitoy va O‘zbekiston o‘rtasidagi iqtisodiy aloqalarning o‘sishi hamda ikki mamlakatning sayyohlik salohiyatini hisobga olgan holda, iste’molchilar uchun yanada qulay sharoitlar yaratish imkoniyatlari ham muhokama qilindi.