Prezident YeOII sammitida ishtirok etdi
Shavkat Mirziyoyev Sankt-Peterburgda bo‘lib o‘tgan Oliy Yevroosiyo iqtisodiy kengashining majlisida kuzatuvchi sifatida ishtirok etdi. Armaniston bosh vaziri Nikol Pashinyan raisligida tashkil etilgan yig‘ilishda YeOII mamlakatlari yetakchilari, shuningdek, kuzatuvchi davlatlar, jumladan, Eron va Kuba vakillari ishtirok etdi.
Asosiy e’tibor savdo-iqtisodiy hamkorlikni, sanoat kooperatsiyasini kengaytirish va qo‘shma dasturlarni amalga oshirish masalalariga qaratildi. O‘zbekiston Prezidenti mamlakatimizning Yevroosiyo iqtisodiy ittifoqi bilan hamkorligi ko‘plab yo‘nalishlarda faol rivojlanib borayotganini ta’kidladi. O‘tgan yil davomida O‘zbekistonning YeOII mamlakatlari bilan tovar ayirboshlash hajmi 11 foizga oshdi va oktyabr oyida Yevroosiyo iqtisodiy komissiyasi bilan uch yillik hamkorlik rejasi tasdiqlandi.
Prezident savdo to‘siqlarini bartaraf etish, texnik jihatdan tartibga solish tizimlarini yaqinlashtirish va bojxona tranzitining elektron tizimini joriy etish muhimligini ta’kidladi. Shuningdek, O‘zbekiston kelgusi yil boshida Yevroosiyo taraqqiyot bankiga a’zo bo‘lish jarayonlarini yakunlashga tayyorligi bildirildi.
Bundan tashqari, Prezident ishbilarmonlik aloqalarini mustahkamlash va qo‘shma tashabbuslarni qo‘llab-quvvatlash maqsadida YeOII Ishbilarmonlar kengashining yig‘ilishini 2025-yil aprel oyida Toshkentda o‘tkazishni taklif qildi. Shuningdek, u raqamlashtirish sohasida faol hamkorlik qilish, shu jumladan “Raqamli ittifoq” loyihasiga qo‘shilish, qishloq xo‘jaligida esa mahsulotlardan o‘zaro foydalanishni osonlashtirish va innovatsion loyihalarni amalga oshirish uchun kooperatsiya dasturini yaratish zarurligiga e’tibor qaratdi.
Davlat rahbari YeOII mamlakatlari fuqarolarining O‘zbekistonga kirish tartibini soddalashtirishga tayyorligini bildirib, chegarani kesib o‘tish uchun ichki hujjatlardan foydalanishni taklif qildi. Uning so‘zlariga ko‘ra, bu qadamlar O‘zbekiston va Yevroosiyo iqtisodiy ittifoqi o‘rtasidagi aloqalarni yanada mustahkamlashga xizmat qiladi.