O‘zbekiston MARES dasturi vazirlar konferensiyasida ishtirok etdi
O‘zbekiston delegatsiyasi o‘rinbosar vazir Xurram Teshaboyev boshchiligida Ostona shahrida bo‘lib o‘tgan Markaziy Osiyo mintaqaviy iqtisodiy hamkorlik dasturining (MOMIHD) 23-Vazirlar konferensiyasida ishtirok etdi.
Konferensiyada iqlim o‘zgarishi, energiya xavfsizligi va innovatsiyalarni joriy etish bilan bog‘liq asosiy masalalar muhokama qilindi. Xususan, MARESning iqlim bo‘yicha harakatlar rejasi, karbonsizlantirish bo‘yicha yangi yondashuvlar, ekologik muammolarni hal qilishda sun’iy intellektdan foydalanish va MARES 2 transport yo‘lagini rivojlantirish haqida so‘z yuritildi.
Majlislar davomida ishtirokchi mamlakatlar va Osiyo taraqqiyot banki (OTB), Jahon banki hamda Yevropa tiklanish va taraqqiyot banki kabi xalqaro tashkilotlar vakillari ma’ruzalar bilan chiqib, hamkorlikdagi yutuqlar va rejalarni muhokama qildilar. O‘zbekistonda amalga oshirilayotgan islohotlar energetika, innovatsiyalar, raqamlashtirish va ekologiya sohalaridagi hamkorlikni mustahkamlashga xizmat qilayotgani ta’kidlandi.
So‘nggi 20 yil ichida O‘zbekiston MARESning 19 milliard dollarlik loyihalarini amalga oshirdi, kelgusi besh yilda esa 12,6 milliard dollarlik loyihalarni hayotga tatbiq etish rejalashtirilmoqda. Energetikani rivojlantirish, raqamlashtirish, “yashil” rivojlanish, elektron savdo va “Xitoy — Qirg‘iziston — O‘zbekiston” temir yo‘lini qurish ustuvor yo‘nalishlar qatoriga kiradi.
Anjuman doirasida muhim bitim va memorandumlar imzolandi. Jumladan, OTB va Xitoy, OTB va Koreya o‘rtasida iqlim loyihalarini tayyorlash jamg‘armalari to‘g‘risidagi bitimlar, shuningdek, Ozarbayjon, Qozog‘iston va O‘zbekiston bilan “yashil” energetika sohasidagi hamkorlik memorandumlari imzolandi.
OTB O‘zbekistonga Jahon savdo tashkilotiga (JST) a’zo bo‘lishni qo‘llab-quvvatlash uchun texnik yordam ko‘rsatdi va transport yo‘laklarini modernizatsiya qilish hamda temir yo‘llarni elektrlashtirish bo‘yicha loyihalarni tezlashtirishga tayyorligini bildirdi. Konferensiya yakunida vazirlarning qo‘shma bayonoti qabul qilindi va 2025-yilga mo‘ljallangan MARESga raislik Qirg‘izistonga topshirildi.