O‘zbekiston Rossiya bilan savdo-iqtisodiy hamkorlikni kengaytiradi
O‘zbekiston investitsiyalar, sanoat va savdo vaziri Laziz Qudratov O‘zbekiston va Rossiya o‘rtasidagi tovar ayirboshlash hajmini oshirish bo‘yicha Ishchi guruhning uchinchi yig‘ilishida ishtirok etdi. Mazkur yig‘ilish onlayn formatda o‘tkazilib, unda ikki tomonlama hamkorlikning joriy holati va savdo, sanoat, energetika, transport va qishloq xo‘jaligi sohalarida kelishuvlarni tezkor amalga oshirish yo‘llari muhokama qilindi.
Joriy yilning o‘tgan o‘n oyida ikki davlat o‘rtasidagi tovar ayirboshlash hajmi 20% ga oshib, 9,7 milliard AQSh dollarini tashkil etdi. O‘zbekistondan Rossiyaga eksport qilinadigan mahsulotlarning assortimenti 68 yangi pozitsiya bilan kengaygani ikki tomonlama savdoning o‘sish salohiyatini ko‘rsatadi.
Uchrashuvda 2024—2030-yillar uchun mo‘ljallangan Hamkorlik rejasi muhokama qilindi. Unda tovar ayirboshlash hajmini 30 milliard AQSh dollariga yetkazish maqsadi qo‘yilgan. Ushbu maqsadga erishish uchun sanoat, transport va qishloq xo‘jaligi sohalarida hamkorlikni kuchaytirish bo‘yicha Kompleks chora-tadbirlar ishlab chiqilishi kelishib olindi.
Uchrashuv yakunida tomonlar iqtisodiy aloqalarni mustahkamlashga tayyor ekanliklarini bildirdilar. Yil oxirigacha Moskvada bo‘lib o‘tadigan Iqtisodiy hamkorlik bo‘yicha hukumatlararo komissiyaning navbatdagi yig‘ilishi rejalashtirildi.