O‘zbekiston va Mo‘g‘uliston qishloq xo‘jaligi va tog‘-kon sanoatidagi hamkorlikni kengaytiradi
O‘zbekiston investitsiyalar, sanoat va savdo vaziri Laziz Qudratov Mo‘g‘uliston Buyuk Davlat Xurasi a’zosi va Mo‘g‘uliston-O‘zbekiston parlamentlararo guruhi rahbari Suhbaatar Erdenebat bilan muzokaralar o‘tkazdi.
Tomonlar ilgari erishilgan oliy darajadagi kelishuvlarni amalga oshirish hamda qishloq xo‘jaligi va tog‘-kon sanoatida kelgusida hamkorlik qilish imkoniyatlarini muhokama qildilar.
Hamkorlikning huquqiy asoslarini mustahkamlash maqsadida O‘zbekiston-Mo‘g‘uliston hukumatlararo komissiyasining birinchi yig‘ilishini dekabr oyida o‘tkazish taklif etildi. Ushbu yig‘ilishda ikki mamlakat o‘rtasida imtiyozli savdo, investitsiyalarni o‘zaro himoya qilish to‘g‘risidagi bitim va sanoat kooperatsiyasi dasturini muhokama qilish rejalashtirilgan.
Uchrashuv yakunida tomonlar hamkorlikni chuqurlashtirish va muhokama qilingan yo‘nalishlarni amalga oshirishni tezlashtirishga tayyor ekanliklarini tasdiqladilar.