O‘zbekiston va Malayziya qo‘shma sanoat zonasini yaratmoqchi
O‘zbekiston Investitsiyalar, sanoat va savdo vazirligida vazir Laziz Qudratov va Malayziya parlamenti yuqori palatasi raisi o‘rinbosari Nur Jazlan Muhammad o‘rtasida uchrashuv bo‘lib o‘tdi.
Qudratov so‘nggi yillarda O‘zbekiston va Malayziya o‘rtasidagi munosabatlar ijobiy rivojlanib borayotganini ta’kidladi. Mamlakatimiz Malayziyaga xizmat ko‘rsatish, kimyo va oziq-ovqat mahsulotlari eksportini ko‘paytirmoqda. Bundan tashqari, Toshkentda Malayziya tashqi savdoni rivojlantirish korporatsiyasining (MATRADE) vakolatxonasi ochildi. O‘zbekistonda Malayziya kapitali ishtirokida 37 ta korxona faoliyat yuritmoqda.
Har ikki tomon hamkorlikni kengaytirish va uning salohiyatini ro‘yobga chiqarishga umumiy intilishini bildirdi. Ikki tomonlama savdo-iqtisodiy aloqalarni rivojlantirish uchun yangi istiqbolli yo‘nalishlar, jumladan, Malayziyaning yirik kompaniyalari bilan qo‘shma loyihalarni amalga oshirish uchun ‘O‘zbekiston-Malayziya industrial zonasi"ni tashkil etish belgilab olindi.
Uchrashuv yakunida tomonlar kelgusidagi hamkorlik shakli, mas’ullarni tayinlash va muhokama qilingan loyiha va tashabbuslarni amalga oshirish muddatlari to‘g‘risida kelishib oldilar.