Senatda hududlarni ijtimoiy-iqtisodiy rivojlantirish masalalari muhokama etildi
Oliy Majlis Senati qo‘mitalarining yig‘ilishida Andijon, Jizzax, Namangan va Xorazm viloyatlari hokimliklarining mazkur hududlarni ijtimoiy-iqtisodiy rivojlantirish bo‘yicha hisobotlari tinglandi.
Hududlar byudjet rejalarini bajarishda ijobiy natijalarga erishgani qayd etildi. Yanvar-sentyabr oylarida to‘rtta viloyat byudjetiga tushumlar 8,7 trillion so‘mni tashkil etib, prognoz ko‘rsatkichlaridan oshib ketdi. Ilgari faoliyat ko‘rsatmagan 12 mingdan ortiq korxona qayta ishga tushirildi, 13 mingdan ziyod yangi korxona tashkil etildi. Yoshlar sanoat zonalarida amalga oshirilayotgan loyihalar o‘n minglab ish o‘rinlari yaratish imkonini berdi. Shuningdek, 4 ming kilometrdan ortiq yo‘llarni qayta qurish uchun qariyb 1,7 trillion so‘m mablag‘ o‘zlashtirildi.
Biroq senatorlar hal etilmagan muammolarga ham e’tibor qaratdilar. Jumladan, Oltinko‘l tumanida xorijiy investitsiyalarni jalb qilish rejasi atigi 58,8 foizga bajarilgan bo‘lsa, Zafarobod tumanida sanoat ishlab chiqarishining o‘sish sur’ati 88,4 foizni tashkil etgan, xolos. Bunday ko‘rsatkichlar qo‘shimcha chora-tadbirlar va e’tiborni talab etadi.