O‘zbekistonda mobil aloqa operatorlari uchun aksiz solig‘i bekor qilinishi rejalashtirilmoqda
Oliy Majlis Qonunchilik palatasining yalpi majlisida 2025-yilga mo‘ljallangan asosiy soliq va byudjet qonunlarini qabul qilish bilan bog‘liq bir qator qonun hujjatlariga o‘zgartishlar kiritish to‘g‘risidagi birinchi qonun loyihasi ko‘rib chiqildi.
2025-yilda barqaror soliq stavkalarini saqlab qolish va qo‘shimcha imtiyozlarni joriy etish orqali tadbirkorlarni qo‘llab-quvvatlash ko‘zda tutilmoqda. Xususan, ushbu sohaga kiritilayotgan investitsiyalar hajmini oshirish, aloqa va internet sifatini yaxshilash maqsadida mobil aloqa operatorlari uchun aksiz solig‘ini bekor qilish rejalashtirilmoqda. Bozor va savdo majmualarida faoliyat yuritayotgan yakka tartibdagi tadbirkorlar uchun jismoniy shaxslardan olinadigan daromad solig‘i va ijtimoiy soliq stavkalarini pasaytirish taklif etildi.
Deputatlar mahalliy Kengashlarning ayrim faoliyat turlari uchun qat’iy belgilangan soliq stavkalarini o‘rnatish bo‘yicha vakolatlarini kengaytirish masalasini ham muhokama qildilar. Bu hududiy xususiyatlarni hisobga olish va mahalliy byudjetlar daromadlarini oshirish imkonini beradi. O‘zbekistonning xalqaro hamjamiyatga integratsiyalashuvi uchun muhim qadam bo‘ladigan milliy qonunchilikni Jahon savdo tashkiloti me’yorlariga muvofiqlashtirish chora-tadbirlariga alohida e’tibor qaratildi.
Nashriyot va matbaa korxonalarini qo‘llab-quvvatlash, soliq ma’muriyatchiligi ustidan nazoratni kuchaytirish, atrof-muhitni muhofaza qilish va soliq bazasini kengaytirish yangi siyosatning asosiy yo‘nalishlari sifatida belgilandi.