Mamnun, ammo takomillashtirish so‘ralmoqda: O‘zbekistonliklar bank xizmatlarini qanday baholayapti?
Iqtisodiy tadqiqotlar va islohotlar markazi (ITIM) O‘zbekistondagi turli banklarning 1100 dan ortiq mijozlaridan so‘rov o‘tkazib, fuqarolarning moliyaviy xizmatlar sifatini qanday baholayotganini aniqladi. Umumiy xulosa: banklarga bo‘lgan ishonch yuqoriligicha qolmoqda, biroq mijozlar ayniqsa kreditlar va raqamli yechimlar borasida yaxshilanishlarni kutmoqda.
Asosiy natijalar:
So‘rovda qatnashganlarning 80 foizdan ortig‘i banklar faoliyatini ijobiy baholagan.
Eng yaxshi yo‘nalishlar depozit mahsulotlari (90 foizgacha mamnunlik), to‘lovlar (81 foiz) va pul o‘tkazmalari (78 foiz) bo‘ldi.
Norozilik darajasi birorta yo‘nalishda ham 14 foizdan oshmadi.
Biroq so‘rov ishtirokchilarining 38 foizi eng katta muammolar kreditlash bilan bog‘liq ekanini ta’kidlagan — bu mijozlar nazarida eng zaif yo‘nalish hisoblanadi.
E’tirozlar soni bo‘yicha ikkinchi o‘rinda to‘lov xizmatlari (25 foiz), keyin esa pul o‘tkazmalari (11 foiz), depozitlar va valyuta operatsiyalari (9 foizdan) turadi.
So‘rov shuni ko‘rsatdiki, raqamlashtirish hali hammani qamrab olmagan: mijozlarning 27 foizi faqat naqd puldan foydalanadi, yana 32 foizi esa naqd va naqdsiz shakllarni birga qo‘llaydi.
Bunday tanlovning sabablari:
Ish haqini naqd olish (40 foiz),
Onlayn xizmatlarga ishonchsizlik (35 foiz),
Qog‘ozda tasdiqlashga o‘rganib qolganlik (12 foiz).
Qiziq tomoni shundaki, bank tanlashda so‘rovda qatnashganlarning 70 foizi reklama yoki raqamli kanallar emas, balki tanishlarining maslahatlariga tayanar ekan.