IT-parkka 112 ta eksportchi kompaniya rezident bo‘ldi
2024-yilning oktyabr va noyabr oylarida IT-parkka 112 ta yangi eksportga yo‘naltirilgan kompaniya rezident sifatida qo‘shildi. Ularning 59 tasi AQSH, Kanada, Buyuk Britaniya, BAA, Yaponiya, Xitoy, Turkiya, Shveysariya, Malayziya, Portugaliya, Niderlandiya va Polshadan bo‘lgan xorijiy sarmoyali kompaniyalardir.
O‘zbekistonning IT sohasiga qiziqish, ayniqsa Yevropa va Osiyo mamlakatlaridan, jumladan Yaponiya, Xitoy, Portugaliya, Vengriya, Shveysariya va Malayziyadan ortib bormoqda. Xorijiy kompaniyalar autsorsing loyihalarini topshirish va qo‘shma tashabbuslarga kirishish orqali O‘zbekiston bozoriga faol kirib kelmoqda.
Portugaliya-Vengriya kompaniyasi KARAMi allaqachon mahalliy mutaxassislarni ishga olib, moliyaviy rejalashtirish va investitsiya loyihalarini ishlab chiqish xizmatlarini ko‘rsatmoqda. Malayziyaning BEUKITCH EV kompaniyasi dasturiy ta’minot yaratish bilan shug‘ullanib, AQSH va Malayziya bozorlariga yo‘naltirilgan.
Boshqa misollar orasida Yaponiyaning FUJIYAMA LOGISTICS kompaniyasi bor. U logistika sohasida dasturiy yechimlarni ishlab chiqish uchun yapon tilini biladigan mutaxassislarni yollaydi. Malayziyaning GET-ACADEMY kompaniyasi ma’lumotlarni qayta ishlash, xodimlarni boshqarish va mijozlarni qo‘llab-quvvatlash xizmatlarini taqdim etadi. Kanadaning UNLOCKWARE IT SERVICES kompaniyasi esa o‘z xizmatlarini Qatar, Saudiya Arabistoni, Kanada va AQShga eksport qilishni rejalashtirmoqda.
Ushbu kompaniyalarning birinchi yildagi jami eksport hajmi, rejalarga ko‘ra, 70 million dollardan oshadi va eksport bozorlari Shimoliy Amerika, Yevropa va Osiyo mamlakatlarini qamrab oladi.