Davlat banklari tadbirkorlarni qo‘llab-quvvatlash uchun bir milliard dollar ajratadi
Shavkat Mirziyoyev mahallalarda aholi bandligini ta’minlash va daromadlarini oshirish bo‘yicha asosiy vazifalarga bag‘ishlangan videoselektor yig‘ilishini o‘tkazdi. Amalga oshirilgan tashabbuslar natijalari, 2025-yilga mo‘ljallangan rejalar va kichik biznesni qo‘llab-quvvatlash choralari muhokama qilindi.
So‘nggi yillarda banklarning hududlarni rivojlantirishdagi faol ishtiroki sezilarli natijalarga erishish imkonini berdi. Masalan, Namangan viloyatining Uychi tumanida banklarning ko‘magi tufayli to‘qqiz ming kishi ish bilan ta’minlandi, kam ta’minlangan oilalar soni olti mingtaga qisqardi. Sayxunobod, Zarbdor va G‘ijduvon kabi boshqa tumanlarda o‘n minglab ish o‘rinlari yaratilib, minglab oilalarning turmush sharoiti yaxshilandi.
Prezident bu muvaffaqiyatli tajribalarni kengaytirish muhimligini ta’kidladi. Kelgusi yilda “Kichik biznesni qo‘llab-quvvatlash” dasturi doirasida 300 million so‘m miqdorida shartsiz kreditlar ajratilib, bir yarim million ish o‘rni yaratiladi. Bundan tashqari, to‘qqizta davlat banki tadbirkorlarni qo‘llab-quvvatlash uchun bir milliard dollar kredit ajratadi, o‘ttizta tumandagi kooperativlarni rivojlantirishga esa 500 milliard so‘m yo‘naltiriladi.
Startaplarni qo‘llab-quvvatlashga alohida e’tibor qaratildi. Davlat banklari venchur kompaniyalarini tashkil etib, mahallalarda istiqbolli loyihalarni rivojlantirishga 50 million dollar yo‘naltiradi. Shuningdek, boshqa hududlardan tadbirkorlar qoloq hududlarda faoliyat yuritishga jalb qilinib, 1,3 million aholining daromadi ta’minlanadi.
Mirziyoyev yerdan oqilona foydalanish zarurligini ta’kidladi. Norentabel yerlar birlashtirilib, mahsuldorligini oshirish uchun yetakchi tadbirkorlarga ikkilamchi ijaraga beriladi.
Bundan tashqari, kelgusi yilda tashqi manbalardan olti milliard dollar jalb qilish va aholi omonatlari hajmini o‘n bir milliard dollarga yetkazish rejalashtirilgan. Qolaversa, davlat banklari mikromoliyaviy kompaniyalarni ochish va moliyalashtirishning yangi shakllarini rivojlantirish imkoniyatiga ega bo‘ladi.