Oʻzbekiston Chexiya bilan savdo hajmini oshiradi
Shavkat Mirziyoyev Chexiya Bosh vaziri Petr Fiala bilan uchrashuv oʻtkazdi. Uchrashuvda oʻzbek-chex munosabatlarini rivojlantirish va iqtisodiy hamkorlikni kengaytirish masalalari muhokama qilindi.
Chexiya Yevropada Oʻzbekistonning muhim hamkorlaridan biri boʻlib qolmoqda. Soʻnggi yillarda ikki tomonlama savdo hajmi ikki baravar oshdi, qoʻshma korxonalar va loyihalar soni esa uch baravarga koʻpaydi.
Suhbat davomida tomonlar Hukumatlararo komissiya ishini faollashtirish va savdo hajmini oshirish boʻyicha “yoʻl xaritasi” ishlab chiqish zarurligini taʼkidladilar. Shuningdek, aniq loyihalar bilan sanoat kooperatsiyasi dasturini yaratish rejalashtirilmoqda.
Bundan tashqari, uchrashuvda mamlakatlar oʻrtasida oʻzaro tushunishni mustahkamlash uchun madaniy-gumanitar aloqalarni kengaytirish masalasi ham koʻtarildi.