Farg‘onadan to‘g‘ridan-to‘g‘ri: yangi logistika markazi O‘zbekiston qishloq xo‘jaligi mahsulotlarini Rossiyaga uzluksiz yetkazib berishni ta’minlaydi
Omsk viloyatida O‘zbekiston va Rossiya o‘rtasidagi agrosanoat sohasidagi hamkorlikning yangi bosqichini belgilovchi "Frukt-Siti" ulgurji-taqsimlash logistika markazining tantanali ochilish marosimi bo‘lib o‘tdi. Ochilish marosimida Farg‘ona viloyati hokimi Xayrullo Bozorov, O‘zbekiston Respublikasining Rossiya Federatsiyasidagi Favqulodda va muxtor elchisi Botirjon Asadov, Rossiya hukumati vakillari hamda o‘zbekistonlik tadbirkorlar ishtirok etdilar.
700 million rubl qiymatidagi keng ko‘lamli loyiha o‘zbekistonlik investorlar mablag‘lari hisobiga amalga oshirilib, 9 gektar maydonni egalladi. Markaz tarkibiga meva-sabzavot mahsulotlarini uzoq muddat saqlash, qayta ishlash va sotish uchun mo‘ljallangan umumiy maydoni 6 ming kvadrat metrdan ortiq bo‘lgan 16 ta angar kiradi. Majmua hududida qishloq xo‘jaligi va oziq-ovqat mahsulotlarining keng turlarini taklif etuvchi 72 ta do‘kon faoliyat ko‘rsatmoqda.
Logistikaga alohida e’tibor qaratilgan: yuk mashinalari uchun 450 ta to‘xtash joyi ulgurji savdoning uzluksiz va samarali jarayonini ta’minlaydi. To‘xtash joyining qulay joylashuvi transportni tez yuklash va tushirish imkonini beradi.
"Frukt-Siti" o‘zbek mahsulotlarining eng sara namunalarini namoyish etishga mo‘ljallangan Farg‘ona savdo uyi uchun ham maydonga aylandi.
Markazning ochilish marosimida so‘zga chiqqan Farg‘ona viloyati hokimi Xayrullo Bozorov markazning tashkil etilishi mintaqalar o‘rtasidagi strategik sheriklik va ishonchning natijasi ekanligini ta’kidladi. U "Frukt-Siti" rossiyaliklarni ulkan qishloq xo‘jaligi salohiyatiga ega bo‘lgan Farg‘ona viloyatining tabiiy va sifatli mahsulotlari bilan ta’minlashda muhim omil bo‘lishiga ishonch bildirdi.
Tashkilotchilarning aytishicha, markazda yo‘lga qo‘yilgan saqlash tizimi, logistika va maxsus do‘konlar tufayli O‘zbekiston qishloq xo‘jaligi mahsulotlarini Rossiyaga yetkazib berish hajmi sezilarli darajada oshadi. Loyiha doirasida O‘zbekiston fuqarolari uchun 800 dan ortiq ish o‘rni yaratiladi, ularga yashash va ishlash uchun qulay shart-sharoitlar, jumladan, tibbiy xizmat va ovqatlanish ta’minlanadi.
O‘zA xabar berishicha, tadbir doirasida Farg‘ona ko‘rgazmalar markazi ochildi, bu yerda tashrif buyuruvchilar O‘zbekistonning keng turdagi mahsulotlari bilan tanishish imkoniyatiga ega bo‘ldilar. Viloyat hokimi tadbirkorlar bilan ham uchrashuv o‘tkazib, bozorni rivojlantirish istiqbollari va savdo aloqalarini yanada faollashtirish masalalarini muhokama qildi. Belgilangan vazifalarni amalga oshirish bo‘yicha aniq chora-tadbirlar belgilandi. "Frukt-Siti"ning ochilishi O‘zbekiston va Rossiya o‘rtasidagi iqtisodiy aloqalarni mustahkamlashda muhim qadam bo‘lib, Rossiya bozoriga sifatli qishloq xo‘jaligi mahsulotlarini yetkazib berish uchun ishonchli kanalga aylanishi kutilmoqda.