"Rosmolodej" O‘zbekistonga yo‘naltirilgan yosh rus brendlarini qo‘llab-quvvatlaydi
Yoshlar ishlari bo‘yicha federal agentlik ("Rosmolodej"), Strategik tashabbuslar agentligi va "Roskongress" jamg‘armasi bilan hamkorlikda 35 yoshgacha bo‘lgan yosh tadbirkorlar uchun yangi imkoniyatni e’lon qildi. "Znay nashix" ("O‘zimiznikini bil") tanlovi doirasida o‘sib borayotgan Rossiya brendlarini qo‘llab-quvvatlashga qaratilgan maxsus nominatsiya paydo bo‘ldi.
Rosmolodej rahbari Grigoriy Gurov Rossiyada yoshlarning tadbirkorlikka qo‘shayotgan hissasi salmoqli ekanligini ta’kidladi. "Yoshlar brendlari" maxsus nominatsiyasi g‘oliblari "Rosmolodej. Tadbirkorlik qil" dasturi doirasida xalqaro biznes-missiyada ishtirok etish imkoniyatiga ega bo‘lishadi. Ushbu missiya uchun tanlangan mamlakatlardan biri O‘zbekiston bo‘lib, bu rossiyalik tadbirkorlarga yangi bozorga chiqish imkoniyatini yaratadi.
Biznes-missiya dasturi vazirliklar vakillari bilan ishbilarmonlik uchrashuvlarini, potentsial hamkorlar uchun taqdimotlarni va yetakchi kompaniyalarga tashriflarni o‘z ichiga oladi. Tashkilotchilar parvoz, yashash va transfer xarajatlarini o‘z zimmalariga oladilar, bu esa yosh tadbirkorlarning xalqaro bozorni o‘zlashtirish xarajatlarini sezilarli darajada kamaytiradi. Shuningdek, tajribali ishbilarmonlarning ustoz sifatida yordami ham ko‘zda tutilgan.
Tanlovga, shu jumladan maxsus nominatsiyaga arizalarni 15-maygacha "Znay nashix" tanlov platformasida topshirish mumkin. G‘oliblar 2025-yilning yozida e’lon qilinadi. Hozirgi kunga kelib Rossiyaning 32 ta hududidan "Yoshlar brendlari" nominatsiyasida ishtirok etish uchun 97 ta ariza kelib tushgan.