XXR Eksimbanki Toshkentda mintaqaviy idorasini ochdi
Toshkentda Xitoy Eksport-import banki (Eksimbank) vakolatxonasining tantanali ochilish marosimi bo‘lib o‘tdi. Marosimda bank vitse-prezidenti Yan Dunnin, Xitoyning O‘zbekistondagi elchisi Yu Tszyun, investitsiyalar, sanoat va savdo vaziri o‘rinbosari Ilzat Qosimov ishtirok etdilar.
Qosimov o‘z nutqida Xitoy Eksimbankining ishonchli moliyaviy hamkor sifatidagi ahamiyatini ta’kidlab o‘tdi. U bank ko‘magida O‘zbekistonda umumiy qiymati uch milliard dollardan oshiq bo‘lgan ellikdan ortiq yirik loyihalar amalga oshirilganini qayd etdi. Ushbu loyihalar kimyo sanoati, energetika, transport, axborot texnologiyalari, qishloq va suv xo‘jaligi kabi sohalarni qamrab olgan.
Toshkentda idoraning ochilishi O‘zbekiston-Xitoy hamkorligini mustahkamlashda muhim bosqich bo‘ldi. Yangi idora ijtimoiy ahamiyatga ega tashabbuslarni amalga oshirish va mamlakatlar o‘rtasidagi iqtisodiy aloqalarni rivojlantirishga xizmat qiladi. U nafaqat O‘zbekistondagi, balki mintaqadagi boshqa davlatlar, jumladan Qozog‘iston, Qirg‘iziston, Tojikiston, Turkmaniston, Ozarbayjon, Armaniston va Gruziya loyihalarini muvofiqlashtirish uchun asosiy vosita bo‘lishi kutilmoqda.
1994-yilda tashkil etilgan Xitoy Eksimbanki davlat banki hisoblanadi va uning faoliyati tashqi savdo, investitsiyalar hamda xalqaro iqtisodiy hamkorlikni qo‘llab-quvvatlashga qaratilgan. Uning butun dunyo bo‘ylab vakolatxonalari, jumladan Parij, Rossiya va Afrikadagi idoralari mavjud.