O‘zbekiston Osiyo-Tinch okeani mintaqasida savdoni soddalashtirish to‘g‘risidagi bitimga qo‘shildi
2025-yil 3-fevraldan boshlab O‘zbekiston ‘Osiyo-Tinch okeani mintaqasida chegaralararo qog‘ozsiz savdo tartib-qoidalarini soddalashtirish to‘g‘risidagi Asosiy bitim‘ning to‘laqonli ishtirokchisiga aylanadi. Bu qadam mamlakatning jahon savdo tizimiga qo‘shilishi va xalqaro tovar ayirboshlashni osonlashtirish bo‘yicha strategiyasining muhim qismi hisoblanadi.
Birlashgan Millatlar Tashkilotining Osiyo va Tinch okeani uchun Iqtisodiy va ijtimoiy komissiyasi (ESKATO) tomonidan 2016-yil 19-mayda qabul qilingan Asosiy bitim savdo hujjatlari va ma’lumotlarni elektron shaklda erkin almashish uchun sharoit yaratishga qaratilgan. 2021-yilda kuchga kirgan hujjat savdo infratuzilmasini rivojlantirish, milliy va submintaqaviy tizimlarning mosligini oshirish hamda mamlakatlar o‘rtasida ma’lumotlar almashinuvini tezlashtirish maqsadini ko‘zlaydi. Hozirgi paytda bitimga 14 ta davlat qo‘shilgan.
Kelishuv Osiyo-Tinch okeani mintaqasi bozorlariga kirishni osonlashtiradi va boshqa davlatlar bilan aloqalarni mustahkamlagan holda savdo jarayonidagi xarajatlarni kamaytiradi. Shuningdek, u ma’lumotlarni elektron qayta ishlash orqali savdo operatsiyalarining shaffofligini va xavfsizligini oshirishga qaratilgan bo‘lib, bu ayniqsa raqamli iqtisodiyotning o‘sishi sharoitida dolzarb ahamiyatga ega.
Investitsiyalar, sanoat va savdo vazirligi xalqaro shartnoma doirasidagi majburiyatlarni bajarish uchun mas’ul etib belgilandi.