O‘zbekiston va Qatar yangi transport loyihalarini muhokama qildi
O‘zbekiston delegatsiyasining Qatarga ish tashrifi davomida transport vaziri o‘rinbosari Jasurbek Choriyev Qatar transport vaziri o‘rinbosari Hamad Al-Essa bilan uchrashuv o‘tkazdi. Uchrashuvda asosiy e’tibor transport infratuzilmasini rivojlantirish va transport yo‘laklaridan samarali foydalanish masalalariga qaratildi.
Muhokama mavzularidan biri Transafg‘on temir yo‘lini qurish loyihasi bo‘ldi. Choriyev ta’kidlaganidek, loyihaning texnik-iqtisodiy tahlili yakunlangandan so‘ng, investorlar va hamkorlarni jalb qilish bosqichi boshlanadi. U Qatar tomonini ushbu loyihaning amaliy ijrosiga o‘tishni tezlashtirish maqsadida unda ishtirok etishga taklif etdi.
Shuningdek, tomonlar Qatarning shahar transport tizimini rivojlantirish borasidagi tajribasini muhokama qildilar, jamoat transportida qo‘llaniladigan usullar va ularni O‘zbekistonda joriy etish imkoniyatlari haqida fikr almashdilar.