Senat ipoteka krediti bozorini rivojlantirish to‘g‘risidagi qonunni ma’qulladi
Senatning ikkinchi yalpi majlisida ‘Ipoteka krediti bozorini yanada rivojlantirish munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida‘gi qonun ko‘rib chiqildi.
Kiritilgan o‘zgartirishlar ‘Ipoteka to‘g‘risida"gi, ‘Qimmatli qog‘ozlar bozori to‘g‘risida"gi va ‘To‘lovga qobiliyatsizlik to‘g‘risida‘gi qonunlarga taalluqli bo‘lib, garov va garov xati shartnomalari bo‘yicha huquqlarni rasmiylashtirish, ularni ro‘yxatdan o‘tkazish va uchinchi shaxslarga o‘tkazish jarayonini takomillashtirish imkonini beradi.
Muhim yangiliklardan biri garov xatlarini rasmiylashtirish jarayonini soddalashtirish hisoblanadi. Ilgari buning uchun tomonlarning ishtirok etishi va ro‘yxatdan o‘tkazuvchi organlarga shaxsan murojaat qilish talab etilardi, bu esa garov xatlari ko‘p bo‘lgan holatlarda noqulayliklar keltirib chiqarardi. Endilikda garov xatlarini onlayn rasmiylashtirish, shuningdek, davlat xizmatlari markazlari orqali murojaat qilish imkoniyatini joriy etish rejalashtirilmoqda. Bu vaqt va kuch sarfini sezilarli darajada kamaytiradi.
Bundan tashqari, qonun tashkilotlarning o‘z kapitalidan ortiq miqdordagi obligatsiyalarni chiqarish orqali ipoteka kreditlarini qayta moliyalashtirishga mablag‘larni jalb qilish mexanizmini yaratishni nazarda tutadi.
Senatorlar ushbu o‘zgartirishlar ipoteka krediti bozorini rivojlantirishga, qayta moliyalashtirish tizimini takomillashtirishga va uning ishtirokchilari uchun yangi imkoniyatlar yaratishga xizmat qilishini ta’kidladilar. Muhokama yakunida qonun ma’qullandi.