“AgroWorld Uzbekistan 2025” yubiley ko‘rgazmasi o‘z ishini boshladi
11-13 mart kunlari Toshkentda agrosanoat majmuasi uchun ilg‘or texnologiyalar va yechimlarni namoyish etishning muhim maydoniga aylangan “Qishloq xo‘jaligi — AgroWorld Uzbekistan 2025” 20-yubiley xalqaro ko‘rgazmasi o‘tkazilmoqda.
Bu yilgi ko‘rgazmada dunyoning 23 mamlakatidan, jumladan, Belarus, Qozog‘iston, Hindiston, Xitoy, Koreya Respublikasi, Rossiya, Turkiya, Yaponiya va Yevropa Ittifoqi davlatlaridan 130 dan ortiq kompaniya ishtirok etmoqda.
AgroWorld Uzbekistan 2025 ko‘rgazmasida dehqonchilik, chorvachilik, parrandachilik, veterinariya, shuningdek, qishloq xo‘jaligi mahsulotlarini qayta ishlash, tashish va saqlash uchun qishloq xo‘jaligi texnikalari, uskunalari, ehtiyot qismlari, texnologiyalari va materiallari namoyish etilmoqda.
Xususan, rossiyalik ishlab chiqaruvchilar ko‘rgazmada premikslar, omuxta yemlar, mineral o‘g‘itlar, sendvich panellar, tegirmon va elevatorlar uchun uskunalar, shuningdek, yoqilg‘i va zaryadlash infratuzilmasi uchun kompleks yechimlarni o‘z ichiga olgan keng turdagi mahsulotlarni taqdim etdilar.
Ko‘rgazmaning birinchi kuni mehmonlari orasida Rossiyaning O‘zbekistondagi savdo vakili o‘rinbosari Igor Kaminin ham bo‘lib, u Rossiya kompaniyalari vakillari bilan uchrashdi. Uchrashuv davomida u O‘zbekiston bozorida mahsulotlarni ilgari surishning o‘ziga xos xususiyatlari haqida qimmatli ma’lumotlar bilan o‘rtoqlashdi hamda rossiyalik eksportchilar uchun mavjud bo‘lgan moliyaviy va nomoliyaviy davlat qo‘llab-quvvatlash choralari to‘g‘risida so‘zladi.