Laziz Qudratov Saudiya Arabistonidagi investitsiyaviy hamkorlikni muhokama qildi
O‘zbekiston investitsiyalar, sanoat va savdo vaziri Laziz Qudratov Saudiya Arabistoniga tashrif buyurib, Butunjahon investitsiya konferensiyasining 28-yig‘ilishida ishtirok etdi. Tadbirda 100 dan ortiq mamlakat vakillari ishtirok etib, kelgusi yillarda global investitsiyalarni belgilab beradigan asosiy tendensiyalarni muhokama qildilar.
Anjuman doirasida Qudratov Saudiya Arabistoni investitsiyalar vaziri Xolid Al-Falih bilan muzokaralar o‘tkazdi. Tomonlar 2025-yil boshida Samarqandda biznes-forum va Hukumatlararo komissiya yig‘ilishini o‘tkazishga kelishib oldilar.
Bundan tashqari, vazir Saudiyaning yirik kompaniyalari rahbarlari bilan uchrashib, joriy va yangi loyihalarni muhokama qildi. ACWA Power kompaniyasi bilan 15 milliard dollarlik 15 ta loyiha, jumladan, energetika obyektlari qurilishi haqida so‘z bordi. Vision Invest bilan IT, transport va energetika sohasidagi loyihalar ko‘rib chiqildi. MIAHONA kompaniyasi suv tozalash inshootlarini yaratishda ishtirok etishga tayyorligini bildirdi.
Shuningdek, DataVolt, Saudi Tabrid va Almarai kabi boshqa kompaniyalar bilan hamkorlik istiqbollari muhokama qilindi. Muzokaralar mavzulari to‘qimachilik ishlab chiqarishi, ekologik texnologiyalar, transport va tibbiyotga oid bo‘ldi.
Saudiya kompaniyalari O‘zbekistondagi investitsiya sharoitlarini yuqori baholashi va uzoq muddatli hamkorlikka, jumladan, davlat-xususiy sheriklik doirasidagi loyihalarga tayyor ekani ta’kidlandi.