Senatda tashabbusli budjetlashtirish loyihalarining amalga oshirilishi muhokama qilindi
Senatning Budjet va iqtisodiy masalalar qo‘mitasi majlisida tashabbusli budjetlashtirish doirasida ma’qullangan loyihalarni amalga oshirish natijalari ko‘rib chiqildi. Mas’ul vazirliklar va hududlar rahbarlari ushbu loyihalarning joriy holati to‘g‘risida ma’lumot berdilar.
2024-yilda tashabbusli budjetlashtirish uchun 5,7 trillion so‘m ajratilgan bo‘lib, bu o‘tgan yilga nisbatan 26 foizga ko‘pdir. Yilning ikki mavsumi davomida “Ochiq budjet” platformasiga fuqarolardan 63 mingdan ortiq taklif kelib tushdi, ulardan deyarli 4,8 mingtasi g‘olib deb topildi. Ularning aksariyati yo‘llarni ta’mirlash va maktablardagi sharoitlarni yaxshilash bilan bog‘liq.
Majlisda loyihalarni amalga oshirishda shaffoflik va samaradorlikni ta’minlash muhimligi ta’kidlandi. Jarayonda yuzaga kelgan muammolarga alohida e’tibor qaratildi. Xususan, Zarafshon aeroporti binolarini ta’mirlash, Beruniy bog‘ida attraksion o‘rnatish kabi tadbirkorlik faoliyati bilan bog‘liq ayrim loyihalarning ovoz berishga qo‘yilishi va qo‘llab-quvvatlanishi tanqidga uchradi.
Shuningdek, ovoz yig‘ishga majburlash holatlari yuzasidan 74 ta shikoyat kelib tushganligi qayd etildi va bunday qonunbuzarliklarning oldini olish choralari ko‘rish bo‘yicha ko‘rsatmalar berildi.
Majlisda qurilish va xarid bosqichida bo‘lgan deyarli mingta loyiha bo‘yicha ishlarni yakunlashni tezlashtirish zarurligi ta’kidlandi.