Senatda 2025-yil uchun Davlat byudjeti to‘g‘risidagi qonun loyihasi muhokama qilindi
Senatda ‘2025-yil uchun O‘zbekiston Respublikasining Davlat byudjeti to‘g‘risida‘gi qonun loyihasini muhokama qilishga bag‘ishlangan seminar o‘tkazildi.
Ishtirokchilar byudjet loyihasi “O‘zbekiston — 2030” strategiyasining maqsadlari va ularga erishishga qaratilgan vazifalarni inobatga olgan holda tayyorlanganini ta’kidladilar. Qonun loyihasiga makroiqtisodiy ko‘rsatkichlar bashoratlari, mahalliy byudjetlar daromadlari va xarajatlari parametrlari, shuningdek, hududlarga ajratiladigan me’yoriy transfertlar hajmlari kiritilgan.
Loyihaga ko‘ra, 2025-yilda yalpi ichki mahsulotning olti foizga o‘sishi kutilmoqda. 2025-2027 yillarga mo‘ljallangan o‘rta muddatli istiqbolda byudjet taqchilligi yalpi ichki mahsulotning uch foizidan oshmasligi nazarda tutilgan. Shuningdek, byudjetning daromad bazasini kengaytirish, soliq va bojxona imtiyozlarini ularning samaradorligini hisobga olgan holda qayta ko‘rib chiqish choralari muhokama qilindi.
Senatorlar qonun loyihasida “Natijaga yo‘naltirilgan byudjet” tizimini bosqichma-bosqich joriy etish tamoyillari, shuningdek, “Yashil byudjetlashtirish” elementlari belgilanganini ta’kidladilar. Tegishli hokimiyat organlari, shu jumladan Qoraqalpog‘iston Respublikasi Jo‘qorg‘i Kengesi va xalq deputatlari Kengashlari tomonidan tasdiqlanadigan mahalliy byudjetlarni shakllantirishga alohida e’tibor qaratildi.
Seminar davomida mahalliy Kengashlar deputatlari byudjet loyihasi yuzasidan o‘z fikr va takliflarini bildirdilar. Ularga hududlarda byudjetlarni tasdiqlashda asosiy jihatlarni hisobga olish bo‘yicha tavsiyalar berildi.