O‘zbekistonda qariyb 50 million daraxt ko‘chatlari ekildi
Butun respublika bo‘ylab kuz mavsumida milliy “Yashil Makon” loyihasi doirasida daraxt ekish ishlari davom etmoqda. 2024 yilda ushbu loyiha doirasida 80 million daraxt va buta ko‘chatlarini ekish rejalashtirilgan.
Ko‘chat ekish ishlari 8-noyabrda tog‘li hududlarda boshlangan bo‘lsa, 15-noyabrdan Surxondaryo viloyatida, 12-noyabrdan esa boshqa hududlarda davom etmoqda. Bugungi kunga kelib, 49 million 370 ming ko‘chat ekilgan.
Hududlar kesimida Andijon viloyatida 6,2 million, Xorazmda 5,7 million, Buxoroda 4,8 million, Farg‘onada 5,2 million, Qoraqalpog‘iston Respublikasida 4,1 million, Navoiyda 3 million, Namanganda 3,7 million va Toshkent viloyatida 3,7 million ko‘chat ekilgan. Shuningdek, Sirdaryo, Qashqadaryo va Surxondaryo viloyatlarida hamda Toshkent shahrida ham ishlar davom etmoqda. Ekilgan barcha daraxtlar haqidagi ma’lumotlar “Yashil Makon” elektron platformasiga kiritilmoqda.
Ekilgan ko‘chatlar bir necha yo‘nalish bo‘yicha taqsimlanmoqda: taxminan 10 million ko‘chat fermer xo‘jaliklari va paxtachilik klasterlari atrofida, 10 milliondan ortiq ko‘chat bog‘ va uzumzorlar yaratishda, 14 million ko‘chat esa aholi yashash joylari atrofida, obodonlashtirish ob’ektlarida, o‘rmon fondida hamda yo‘llar bo‘ylab ekilgan. Bundan tashqari, ekologik xavf darajasi I-II kategoriyaga mansub korxonalarda “yashil kamarlar” tashkil qilinmoqda.
Loyihaning “Mening bog‘im” dasturi doirasida g‘olib bo‘lgan 215 ta loyiha bo‘yicha ishlar boshlangan. Shuningdek, respublika bo‘ylab ko‘chat narxlarining barqarorligini ta’minlash uchun 600 dan ortiq yarmarka tashkil etilgan. 65 gektar maydonda esa bezak va mevali daraxtlar, butalar ekilayotgan “yashil bog‘lar” yaratilmoqda.
Ekologik holatni yaxshilash bo‘yicha alohida e’tibor Orolbo‘yi hududlariga qaratilmoqda. Ushbu hududda 215 ming gektar maydonda “yashil qoplamalar” yaratilmoqda. Bu qurigan Orol dengizi tubidan ko‘tarilayotgan qum va chang zarrachalarini oldini olishga qaratilgan.