O‘zbekistonda Tahliliy va tadqiqot tuzilmalari bo‘yicha Muvofiqlashtiruvchi kengash tashkil etilmoqda
O‘zbekiston Prezidenti Shavkat Mirziyoyev mamlakatning ijtimoiy, siyosiy va iqtisodiy rivojlanishida strategik tahlil va tadqiqotlarni samarali tashkil etish chora-tadbirlari to‘g‘risidagi qarorni imzoladi. Adliya vazirligi xabar berishicha, 31 dekabr kuni imzolangan hujjat Tahliliy va tadqiqot tuzilmalari faoliyatini tashkil etish bo‘yicha Muvofiqlashtiruvchi kengashni tuzishni nazarda tutadi.
Kengash ichki va tashqi siyosiy jarayonlar bilan bog‘liq strategik tadqiqotlarni muvofiqlashtirish uchun mas’ul bo‘lgan maslahat organi vazifasini bajaradi. Uning asosiy vazifasi O‘zbekiston prezidentiga ichki va tashqi siyosat masalalari bo‘yicha uzoq muddatli tahliliy hujjatlar va takliflarni muntazam ravishda taqdim etib borish etib belgilandi.
Kengash ishiga umumiy rahbarlik qilish, shuningdek, idoralararo hamkorlikni ta’minlash 2023-yil avgust oyidan buyon ushbu lavozimda faoliyat yuritayotgan prezidentning maxsus topshiriqlar bo‘yicha maslahatchisi Sardor Umurzoqov zimmasiga yuklatildi.
Kengash tarkibida xavfsizlik va ijtimoiy barqarorlik, davlat va jamiyat qurilishi, ijtimoiy-iqtisodiy rivojlanish, tashqi siyosat va xalqaro hamkorlik, hududlarni strategik rejalashtirish va rivojlantirish, shuningdek, ekologik masalalar, jumladan iqlim o‘zgarishi va suv taqchilligi kabi yo‘nalishlar uchun mas’ul bo‘lgan ishchi guruhlar tashkil etiladi.