O‘zbekistonda gaz turbinali dvigatellar uchun Rossiya xizmat ko‘rsatish markazi tashkil etiladi
O‘zbekistonda sanoat gaz turbinali dvigatellariga xizmat ko‘rsatishga ixtisoslashgan Rossiya servis markazi tashkil etiladi. Bu haqda "Innoprom" ko‘rgazmasidagi sessiya davomida ODK Injiniring bosh direktorining savdo va xizmat ko‘rsatish bo‘yicha o‘rinbosari Sergey Gulyayev ma’lum qildi.
Gulyayev, shuningdek, kompaniya O‘zbekiston hududidagi "Markaziy Osiyo - Markaz" gaz quvurlari tizimini o‘rganib chiqqanini va kompressor stansiyalari hamda ularning dvigatellarini modernizatsiya qilishda ko‘maklashishga tayyorligini ta’kidladi.
Eslatib o‘tamiz, "Rostex" davlat korporatsiyasining Birlashgan dvigatelsozlik korporatsiyasi (ODK) ko‘rgazmada O‘zbekiston gaz uzatish tizimi (GUT) kompressor stansiyalarini modernizatsiya qilishga mo‘ljallangan zamonaviy texnologiyalarni namoyish etdi. Ilk bor keng jamoatchilikka 8,5 MVt quvvatga ega to‘liq o‘lchamli NK-14ST sanoat gaz turbinali dvigateli ko‘rsatildi. Bu esa ODKning O‘zbekiston bozoridagi jiddiy niyatlarini ta’kidlovchi muhim voqea bo‘ldi.
"Rostex" davlat korporatsiyasining birlashgan stendida joylashtirilgan ODK ekspozitsiyasi magistral gaz quvurlari orqali tabiiy gazni tashish uchun maxsus mo‘ljallangan ilg‘or ishlanmalarni o‘z ichiga oladi.
Gaz qazib olish hajmi bo‘yicha MDHning yetakchi beshta davlati qatoriga kiruvchi O‘zbekiston ODK uchun strategik ahamiyatga ega bozor hisoblanadi. "Rostex" davlat korporatsiyasi bosh direktori o‘rinbosari Dmitriy Lelikov hamkorlikning yuqori salohiyatini ta’kidladi: "O‘zbekiston MDH gaz bozoridagi asosiy ishtirokchilardan biridir. Biz hamkorlarimizga gaz uzatish tizimlari uchun maxsus ishlab chiqilgan turli quvvatdagi eng zamonaviy agregatlarning keng assortimentini taklif etamiz. Bu yetakchi mahalliy gaz qazib oluvchi kompaniyalarning ko‘plab obyektlarida o‘zini yaxshi ko‘rsatgan samarali va ekologik toza uskunalardir. Ishonchimiz komilki, bizning takliflarimiz xorijiy hamkorlarimizda katta qiziqish uyg‘otadi va ular uchun juda foydali bo‘ladi."