Toshkentda birinchi O‘zbekiston-Xorvatiya biznes-forumi o‘tkazildi
Toshkentda ikki mamlakat o‘rtasidagi savdo-iqtisodiy va investitsion aloqalarni rivojlantirishda muhim qadam bo‘lgan birinchi O‘zbekiston-Xorvatiya biznes-forumi bo‘lib o‘tdi. Delegatsiyalarga O‘zbekiston investitsiyalar, sanoat va savdo vaziri Laziz Qudratov hamda Xorvatiya tashqi va Yevropa ishlari vaziri Gordan Radman boshchilik qildi.
Qudratov o‘z nutqida ishbilarmon doiralar o‘rtasidagi faol hamkorlikning va “GSP+” tizimi orqali Yevropa bozorlariga imtiyozli kirish imkoniyatidan foydalangan holda savdo hajmini oshirishning muhimligini ta’kidladi. Shuningdek, raqamli o‘zgarishlar sharoitida hamkorlikni kengaytirish zarurligi alohida qayd etildi.
Forum ishtirokchilariga O‘zbekistonning investitsion imkoniyatlari, jumladan, biznes uchun yaratilgan shart-sharoitlar, tadbirkorlar huquqlarini himoya qilish choralari, shuningdek, mamlakatning raqamli texnologiyalar, farmatsevtika, oziq-ovqat sanoati va qishloq xo‘jaligi kabi sohalardagi salohiyati haqida ma’lumot berildi.
Forum dasturi B2B va B2G formatidagi uchrashuvlarni o‘z ichiga olgan bo‘lib, unda tadbirkorlar yangi aloqalar o‘rnatish va qo‘shma loyihalar tafsilotlarini muhokama qilish imkoniyatiga ega bo‘ldilar.
Mutaxassislar forum g‘oyalar almashish va hamkorlikning yangi yo‘nalishlarini izlash uchun muhim maydon bo‘lganini ta’kidladilar. Erishilgan kelishuvlar O‘zbekiston va Xorvatiya o‘rtasidagi iqtisodiy aloqalarni yanada chuqurlashtirishga asos bo‘ladi.