Shavkat Mirziyoyev xizmat ko‘rsatish sohasini rivojlantirishga ko‘maklashish bo‘yicha topshiriqlar berdi
O‘zbekistonda xizmat ko‘rsatish sohasi jadal sur’atlarda rivojlanishda davom etmoqda. Buni uch yil oldin ishga tushirilgan keng ko‘lamli dastur natijalari ham tasdiqlaydi. Shu vaqt mobaynida 1,5 milliondan ortiq kishi barqaror daromad manbaiga ega bo‘ldi, ko‘rsatilgan xizmatlarning umumiy hajmi esa 2018-yildagi 19 milliard dollardan 65 milliard dollargacha o‘sdi. IT, moliya, turizm, aviatsiya, tibbiyot va ta’lim kabi yo‘nalishlar ayniqsa jadal rivojlanmoqda.
Shu bilan birga, soha salohiyati hali to‘liq ishga solinmagan. Prezident Shavkat Mirziyoyev raisligida 7-fevral kuni o‘tkazilgan yig‘ilishda mavjud muammolar va yangi istiqbollar batafsil muhokama qilindi. Ta’kidlanishicha, Xorazmga 6 million sayyohni jalb qilish rejalashtirilgan, biroq jiddiy infratuzilma cheklovlari, xususan, aviaqatnovlar va temir yo‘l qatnovi yetishmovchiligi saqlanib qolmoqda.
Shuningdek, tibbiyot, energetika va aviatsiya kabi sohalarda xususiy sektor loyihalarida sezilarli o‘sish kuzatilmoqda. Bu yo‘nalishlardagi investitsiyalarning umumiy hajmi allaqachon 20 milliard dollardan oshgan. Biroq yo‘l qurilishi, suv ta’minoti va kanalizatsiya tizimida xususiy kapital ishtiroki hamon juda past darajada qolmoqda.
So‘nggi yetti yil ichida aholi daromadlari ikki barobar oshdi, bu esa xizmatlarga bo‘lgan talabning o‘sishiga olib keldi. Shu munosabat bilan vazirliklar va hokimliklarga xizmatlar turini ko‘paytirish hamda tadbirkorlikni qo‘llab-quvvatlashga qaratilgan yangi tashabbus va loyihalarni ishlab chiqish vazifasi topshirildi.
2025-yilgacha bo‘lgan davr uchun maqsadli ko‘rsatkichlar belgilandi: xizmatlar umumiy hajmi 15 foizga o‘sib, 82 milliard dollarga, eksport hajmi 8,5 milliard dollarga, sohada bandlik esa 2,5 million kishiga yetishi kerak.