Toshkent teleminorasi 40 yoshga to‘ldi
Poytaxtning asosiy me’moriy diqqatga sazovor joylaridan biri hisoblangan Toshkent teleminorasi 2025-yil 15-yanvarda o‘zining 40 yillik yubileyini nishonladi. 1985-yilda qurilishi yakunlanganda u dunyodagi eng baland minoralar orasida to‘rtinchi o‘rinni egallagan edi.
Dastlab loyiha Bag‘dod uchun mo‘ljallangan bo‘lsa-da, 1963-yildagi harbiy to‘ntarish tufayli uning amalga oshirilishi to‘xtatildi. Qurilishni Toshkentga ko‘chirish g‘oyasini Sharof Rashidov qo‘llab-quvvatladi. U Moskvadagi ko‘rgazmada maketni ko‘rib, loyihani amalga oshirish uchun Leonid Brejnevdan rozilik oldi. Bu poytaxt metropolitenini rivojlantirish bo‘yicha keng qamrovli rejaning bir qismi bo‘ldi.
Qiziq tomoni shundaki, teleminoraning dastlabki balandligi hozirgi 375 metrdan past bo‘lishi mo‘ljallangan edi, biroq Olmaotada 371 metrlik Ko‘kto‘be minorasini qurish boshlangach, loyiha qayta ko‘rib chiqildi.
Teleminora foydalanilgan yillar davomida bir nechta yirik hodisalarni boshdan kechirdi. Ular orasida 1986-yilda Mi-8 vertolyotining minora simi bilan to‘qnashuvi ayniqsa fojiali bo‘ldi — natijada bortdagi oltita odam halok bo‘ldi.
Minoraning o‘ziga xos xususiyatlaridan biri uning yuqori qismi kuchli shamolda 6 metr radiusda og‘ish qobiliyatidir. Bu muhandislik hisob-kitoblari natijasida erishilgan.
Korroziyadan himoya qilish maqsadida teleminora har 7-8 yilda maxsus tarkiblar bilan bo‘yaladi. Bu ishlarni maxsus tayyorgarlikdan o‘tgan alpinist-montajchilar amalga oshiradi.