Toshkentda kattalar uchun tez tibbiy yordam bo‘limi qayta qurildi
Toshkent shahridagi Respublika shoshilinch tibbiy yordam ilmiy-tadqiqot markazida kattalar bo‘limini yangilash ishlari yakuniga yetkazildi. O‘zbekiston Sog‘liqni saqlash vazirligi ma’lum qilishicha, yangilangan markaz endi bir vaqtning o‘zida 50 dan ortiq bemorga xizmat ko‘rsata oladi.
Qayta qurish natijasida barqaror holatdagi bemorlar uchun qabul bo‘limining “yashil” hududi ikki barobar kengaytirildi, shuningdek, bemorlarning yaqinlari uchun maxsus kutish xonasi tashkil etildi. Shoshilinch yordam talab qiladigan bemorlar uchun “sariq” hududda sun’iy nafas oldirish apparatlari va boshqa zamonaviy tibbiy jihozlar o‘rnatilgan kuzatuv xonalari barpo etildi. Markaz xalqaro standartlarga muvofiq binolarni joriy ehtiyojlarga tezkor moslashtirish imkonini beruvchi yuqori texnologiyali yechimlar bilan jihozlangan.