Rossiya va O‘zbekiston 2025-2030-yillarga mo‘ljallangan hamkorlik rejasini tasdiqladi
Moskvada bo‘lib o‘tgan Rossiya Federatsiyasi va O‘zbekiston Respublikasi o‘rtasidagi iqtisodiy hamkorlik bo‘yicha hukumatlararo komissiyaning 25-yig‘ilishida Rossiyaning Uzoq Sharqi bilan O‘zbekiston o‘rtasidagi 2025-2030-yillarga mo‘ljallangan hamkorlik rejasi tasdiqlandi. Hujjatni Rossiya Uzoq Sharq va Arktikani rivojlantirish vaziri o‘rinbosari Vitaliy Altabayev hamda O‘zbekiston investitsiyalar, sanoat va savdo vaziri o‘rinbosari Xurram Teshabayev imzoladi.
Reja iqtisodiyot, savdo, ta’lim, tog‘-kon sanoati, shaharsozlik va turizm kabi sohalarda hamkorlikni rivojlantirishni nazarda tutadi. Tomonlar o‘zaro savdo, jumladan agrosanoat mahsulotlari hajmini ko‘paytirish, qo‘shma investitsiya loyihalarini rivojlantirish, foydali qazilmalarni qazib olish va qayta ishlashda innovatsion texnologiyalarni joriy etish, shuningdek hududlarni kompleks rivojlantirish uchun bosh rejalarni ishlab chiqish bo‘yicha kelishib oldilar. Rossiya va O‘zbekiston o‘rtasida tarmoq ta’lim dasturlarini amalga oshirish, yuqori malakali mutaxassislar tayyorlash va sayyohlar oqimini ko‘paytirishga alohida e’tibor qaratildi.
Rejani ishlab chiqish tashabbusi 2024-yil oktyabr oyida Rossiyaning Uzoq Sharq va Arktikani rivojlantirish vaziri Aleksey Chekunkovning Toshkentga tashrifi davomida ilgari surilgan edi.